जम्मू-काश्मीरमधील पहलगाम येथे दहशतवाद्यांनी भ्याड हल्ला करून सुमारे २६ पर्यटकांची हत्या केली होती. या घटनेमुळे देशभरात संतापाचं वातावरण निर्माण झालेलं आहे. पहलगाममध्ये हल्ला करणाऱ्यांमध्ये पाकिस्तानी दहशतवाद्यांसोबत दोन स्थानिक दहशतवाद्यांचाही समावेश असल्याचं समोर आलं होतं. दरम्यान, या हल्ल्यात सहभाग असलेल्या आसिफ शेख आणि आदिल या दोन स्थानिक दहशतवाद्यांची घरं सुरक्षा दलांनी आज उद्ध्वस्त केली.
लष्कराने जम्मू काश्मीरमधील दक्षिण काश्मीर भागात असलेल्या अनंतनाग आणि पुलवामा भागात ही कारवाई केली आहे. या कारवाईत आसिफ शेख आणि आदिल यांची घरं उद्ध्वस्त करण्यात आली आहेत. येथील गुरी परिसरात लष्कर ए तोयबाचा दहशतवादी आदिल ठोकर याचं घर होतं, ते स्फोट घडवून उडवण्यात आलं आहे. तर आसिफ शेख याच्या घरावर बुलडोझर चालवण्यात आला. दरम्यान, २२ एप्रिल रोजी पहलगाममधील बेसरन खोऱ्यात हल्ला केल्यानंतर आसिफ शेख आणि आदिल हे दोघेही फरार आहेत. त्यांना पकडण्यासाठी लष्कराकडून जोरदार शोधमोहीम हाती घेण्यात आली आहे.
आदिल शेख या दहशतवाद्याबाबत मिळालेल्या अधिक माहितीनुसार तो २०१८ मध्ये पाकिस्तानमध्ये गेला होता. तिथे त्याने दहशतवादाचं प्रशिक्षण घेतलं होतं. तसेच प्रशिक्षण पूर्ण झाल्यावर तो पुन्हा काश्मीरमध्ये परतला होता. पहलगामध्ये हल्ला घडवून आणण्यासाठी त्याने पाकिस्तानी दहशतवाद्यांना मदत केल्याचा आरोप आहे. त्यानेच दहशतवाद्यांना बेसरन खोऱ्यापर्यंत पोहोचवल्याचे सांगितले जात आहेत.
दरम्यान, मोहगामा येथे आसिफ शेख याच्या घरामध्ये शोधमोहीम सुरू असताना सुरक्षा दलांना एक संशयास्पद बॉक्स मिळाला. त्या बॉक्समधून तारा बाहेर आलेल्या होत्या. घटनास्थळावरच हा बॉक्स निकामी करण्यात आला. यावेळी छोटासा स्फोट झाला. या स्फोटात कुठलीही जीवितहानी झालेली नाही. दरम्यान, ही कारवाई करण्यापूर्वी आजूबाजूच्या घरांना रिकामी करण्यात आलं होतं.