सीलींकवरून उडी मारणार्‍या तरूणाचे गूढ कायम सीसीटीव्हीत पोहताना, किनार्‍यावरून चालताना आढळला

सीलींकवरून उडी मारणार्‍या तरूणाचे गूढ कायम
सीसीटीव्हीत पोहताना, किनार्‍यावरून चालताना आढळला

मुंबई : वांद्रे-वरळी सेतूवरून समुद्रात उडी मारणार्‍या अनोळखी तरूणाचे गूढ दिवसेंदिवस वाढते आहे. घटनेच्या तीनेक दिवसांनंतर सेतूवरील सीसीटीव्हींनी उडी मारल्यानंतर हा तरूण पोहून किनार्‍यावर उतरला आणि दादरच्या दिशेने चालत गेल्याचे स्पष्ट झाले आहे. त्यामुळे या तरूणाने सेतूवरून सेतूवरून मारलेल्या उडीचा हेतू जाणून घेण्यासाठी पोलीस बेचैन आहेत. त्यासाठी या तरूणाची शोधमोहिम वरळी पोलिसांनी सुरू केली आहे.
१० फेब्रुवारीला संध्याकाळी पाचच्या सुमारास या अनोळखी तरूणाने वांद्रयाहून टॅक्सी पकडली. पोल क्रमांक ७७जवळ टॅक्सी थांबवून तो खाली उतरला. टॅक्सीचालक टोल प्लाझापर्यंत गेला आणि त्याने तेथील सुरक्षारक्षकांना सेतूच्या मध्यावर तरूण उतरल्याची वर्दी दिली. सुरक्षारक्षकांना हा तरूण सेतूवर आढळला नाही. सीसीटीव्हींचे चित्रण न्याहाळले तेव्हा या तरूणाने समुद्रात उडी मारल्याचे आढळले.
त्यानंतर वरळी पोलिसांनी अग्निशमन दल, स्थानिक मच्छिमारांच्या मदतीने समुद्रात तरूणाची शोधमोहिम सुरू केली. मात्र दोन दिवसांनंतरही त्याचा पत्ता लागला नाही. एरव्ही सेतूवरून आत्महत्या केलेल्यांचे मृतदेह दोनेक दिवसांनी वरळी, दादर किंवा वांद्रे किनार्‍यावर लागतात. मात्र चार दिवस लोटले तरी या तरूणाचा काहीच पत्ता न लागल्याने पोलिसांनी सेतूवरील सीसीटीव्हींचे चित्रण बारकाईने पाहिले. या कवायतीत पोलिसांना धक्कादायक घडमोडी समजल्या.
उडी मारल्यावर हा तरूण सुमारे शंभर मिटर पोहला. ओहोटी असल्याने त्याने एका खडकाचा आसरा घेतला. काही वेळ तेथे थांबून तो पोहत पोहत दादर दिशेकडील किनार्‍याला गेला. तेथून तो चालत पुढे निघून गेला.
त्यावरून या तरूणाने आत्महत्येसाठीच समुद्रात उडी मारली का याबाबत प्रश्नचिन्ह निर्माण झाले आहे.