गंगेतील मृतदेहांच्या प्रकरणाची चौकशी सीबीआयकडे द्यावी-मायावती

लखनौ : उन्नाव जिल्ह्यात गंगा नदीच्या पात्रात आढळलेल्या १०० मृतदेहांच्या प्रकरणाची चौकशी केंद्रीय तपास यंत्रणेकडे (सीबीआय) द्यावी अशी मागणी बसपाच्या प्रमुख मायावती यांनी केली आहे.
या घटनेमुळे नागरिकांमध्ये घबराट पसरली असून, त्याची चौकशी सीबीआयकडून केली जावी व या घटनेमागील सत्य लोकांपुढे यावे, असे प्रतिपादन मायावती यांनी केले. त्यांनी यावेळी उत्तर प्रदेश सरकार अपयशी ठरल्याचा आरोप केला. कायद्याची व्यवस्था ढासळली असून येथे गुंतवणूकदार यायला तयार नाहीत व गुंतवणूक करण्यासाठी मुख्यमंत्र्यांनाच फिरावे लागत आहे. अशी परिस्थिती असताना उत्तर प्रदेशात राष्ट्रपती शासन लागू केले जावे, असे त्या पुढे म्हणाल्या. मात्र राज्यपाल केंद्राकडे तशी शिफारस करणार नाहीत हेही आपण जाणतो, अशी जोड त्यांनी पुढे दिली.