देशात अनेक धक्कादायक घटना समोर येत आहेत. काही वेळा मुलं वृद्ध आई-वडिलांची सेवा करण्याऐवजी त्यांनाच आपल्या घरातून हाकलून देत असल्याच्या घटना घडल्या आहेत. याच दरम्यान एक हृदयस्पर्शी घटना समोर आली आहे. बुलंदशहरमध्ये एका मुलाने आपल्या आईची सेवा केली आहे. आपल्या आईसाठी तो श्रावण बाळ झाला आहे.
एक मुलगा आपल्या आईला कावड तयार करून गंगास्नानासाठी घेऊन जाताना दिसत आहे. या घटनेचा एक व्हिडीओ देखील सोशल मीडियावर जोरदार व्हायरल होत आहे. व्हिडीओमध्ये मुलाने आपल्या आईची गंगेत स्नान करण्याची इच्छा पूर्ण करण्यासाठी कावड तयार केली आहे आणि तो ती खांद्यावर घेऊन जाताना दिसत आहे.
सोशल मीडियावर तुफान व्हायरल होणारा व्हिडीओ पाहून लोक या मुलाला आताच्या काळातील श्रावण बाळ असल्याचं म्हणत आहेत. मिळालेल्या माहितीनुसार, हा व्हिडीओ छतारीच्या राजकुमार या तरुणाचा असल्याचं सांगण्यात येत आहे. आईची इच्छा पूर्ण करण्यासाठी मुलाने 3 दिवसात 35 किलोमीटरचा प्रवास करण्याचं लक्ष्य ठेवलं आहे.