मुंबई - ऐकावं ते नवलच असाच काहीसा प्रकार बिहारमध्ये घडला आहे. येथील एका बँक कर्मचाऱ्याने चक्क पंतप्रधान नरेंद्र मोदी, राष्ट्रपती रामनाथ कोविंद आणि मानवाधकार आयोगाला पत्र लिहून सुट्टी मागितली. विशेष म्हणजे, या कर्मचाऱ्याने सुट्टीसाठी दिलेलं कारण वाचून कुणालाही धक्काच बसेल. बायकोचा खून करून तिच्यावर अंत्यंसस्कार करायचेत, त्यासाठी सुट्टी द्या, असे मुन्ना प्रसाद यांनी आपल्या अर्जात म्हटले आहे.
बिहारच्या एका ग्रामीण बँकेत काम करणाऱ्या मुन्ना प्रसाद यांनी हा अर्ज केला होता. बायको आजारी असल्याने तिच्यावर उपचारासाठी त्याला सुट्टी मिळत नव्हती. शेवटी त्याने असा अर्ज करण्याचा मार्ग निवडला. बायकोचा खून करुन तिच्यावर अंत्यसंस्कार करण्यासाठी फक्त दोन दिवसांची सुट्टी द्या असे त्याने रजा अर्जावर म्हटले आहे. विशेष म्हणजे त्याच्या या रजा अर्जाला मंजुरी देण्यात आली आहे. सध्या या बँक कर्मचाऱ्याच्या सुट्टीचा अर्ज सोशल मीडियावर व्हायरल होत आहे. त्यामध्ये त्याने सुट्टीचे विचित्रच कारण लिहिलेलं दिसत आहे. दरम्यान, सुट्टी पूर्ण संपल्यानंतर मुन्ना प्रसाद पुन्हा बँकेत कर्तव्यावर हजर झाले आहेत. मात्र, त्यांच्या या रजा अर्जामुळे बँकेतही ते चांगलेच चर्चेत आले होते.