कोलकाता ट्रेनी डॉक्टरवर झालेल्या बलात्कार आणि हत्या प्रकरणाने संपूर्ण देश हादरला आहे. ज्या रात्री कोलकाता येथील आरजी कार मेडिकल कॉलेजमधील डॉक्टरवर अत्याचार झाला, त्या रात्री मुलीच्या कुटुंबाला रुग्णालयातून फोन करून घटनेची माहिती देण्यात आली. खरी घटना काय आहे हे कॉलवर सांगण्यात आलं नव्हतं. आरजी कार हॉस्पिटलमधून डॉक्टरच्या घरी कॉल करण्यात आला होता, ज्याचा ऑडिओ आता समोर आला आहे.
एका व्यक्तीने फोन केला आणि मुलीच्या पालकांना तातडीने रुग्णालयात येण्यास सांगितलं. तुमच्या मुलीची तब्येत बरी नसल्यामुळे प्लीज लवकर या असं सांगितलं नंतर मुलीने कदाचित आत्महत्या केली असेल असं म्हटलं. पहिल्या कॉलवर असिस्टंट सुपरिटेंडेंटने तुमच्या मुलीची तब्येत खराब झाली आहे. तिला एडमिट केलंय लगेचच रुग्णालयात या असं सांगितलं.
मुलीच्या वडिलांनी काय झालंय? असं विचारल्यावर, तुम्ही आल्यावर तुम्हाला डॉक्टर हे उत्तर देतील असं सांगितलं. दुसऱ्या कॉलवर असिस्टंट सुपरिटेंडंटने मुलीची प्रकृती खूप जास्त खराब झाली आहे, लवकरात लवकर या असं म्हटलं. त्यावर वडिलांनी काय झालंय ते मला सांगा आणि तुम्ही कोण बोलताय? असं विचारलं. तेव्हा तुम्ही इथे जरा लवकर या. असिस्टंट सुपरिटेंडंट बोलतोय असं सांगितलं.
तिसऱ्या कॉलवर असिस्टंट सुपरिटेंडंटने मुलीच्या वडिलांना कदाचित मुलीने आत्महत्या केली असावी. तिचा मृत्यू झाला आहे. पोलीसही आहेत. हॉस्पिटलमध्ये आम्ही सर्वांसमोर आहोत असं सांगितलं. ९ ऑगस्टच्या पहाटे कोलकाता येथील आरजी कार मेडिकल कॉलेजमध्ये एका ट्रेनी डॉक्टरवर बलात्कार करून तिची हत्या करण्यात आली. या घटनेनंतर संजय रॉयची अटक करण्यात आली. त्याच्या चौकशीत अनेक महत्त्वाचे खुलासे झाले आहेत