श्रीनगर - जम्मू-काश्मीरमधील बांदिपोरा येथे कालपासून सुरू असलेल्या चकमकीमध्ये लष्कराने अजून तीन दहशतवाद्यांना कंठस्नान घातले आहे. या चकमकीदरम्यान काल रात्री दोन दहशतवाद्यांना ठार मारण्यात लष्कराला यश मिळाले होते. या चकमकीत एकूण पाच दहशतवादी मारले गेले आहेत.
काश्मीर खोऱ्यात दहशतवाद्यांच्या वाढत्या कारवायांच्या पार्श्वभूमीवर सुरक्षा दलांकडूनही त्यांना चोख प्रत्युत्तर देण्यात येत आहे. दहशतवाद्यांना काश्मीर पोलीस दलातील तीन कर्मचाऱ्यांची काल अपहरण करून हत्या केली होती. त्या पार्श्वभूमीवर सुरक्षा दलांना मिळालेले हे यश महत्त्वाचे मानण्यात येत आहे.
बांदिपोरा जिल्ह्यातील सूमरल गावात लष्कराने लष्कर ए तोयबाच्या दहशतवाद्यांना घेरले होते. त्यानंतर दोन्हीकडून गोळीबार सुरू होता. त्यात गुरुवारी रात्री लष्कराने दोन दहशतवाद्यांना कंठस्नान घातले होते. तर आज तीन अजून दहशतवाद्यांना ठार मारण्यात आले.