लव्ह ट्रँगलमधून एका ६५ वर्षीय वृद्धाची त्याच्या ३५ वर्षीय प्रेयसीने हत्यया केल्याची धक्कादायक घटना मध्य प्रदेशमध्ये घडली आहे. या प्रकरणी पोलिसांनी दोन आरोपींना अटक केली आहे. या हत्येच्या प्रकरणाचा उलगडा करताना पोलिसांनी सांगितले की, लव्ह ट्रँगलमधून घनश्याम कुशवाहा यांची हत्या करण्यात आली होती. घनश्याम यांची प्रेयसी असलेल्या सोनिया हिने तिचा दुसरा प्रियक रोहित याच्यासोबत मिळून घनश्याम यांची हत्या केली.
पोलिसांना ७ ऑक्टोबर रोजी बनगया महामार्गावर एक अर्धवट जळालेला मृतदेह आढळला होता. तपास केल्यानंतर मृताची ओळख घनश्याम कुशवाहा, अशी असल्याचं समोर आलं आहे. या प्रकरणी पोलिसांना तपासाची एकेक साखळी जोडत सीसीटीव्ही फुटेज तपासून शोध घेण्यास सुरुवात केली. त्यामध्ये मृत घनश्याम यांच्यासोबत एक महिला आणि एक पुरुष दिसून आला. त्यांची ओळख सोनिया आणि रोहित यांच्या रूपात झाली.
या दोघांनाही ताब्यात घेऊन चौकशी करण्यात आली. सुरुवातील त्यांनी उडवा उडवीची उत्तरं दिली. मात्र पोलिसांनी आपला खाक्या दाखवताच दोघांनीही गुन्हा कबूल केला. सोनियाने सांगितले की, मी घनश्यामकडे असलेले पैसे आणि त्याला मिळत असलेल्या पेन्शनच्या मोहाने त्याच्यासोबत प्रेमाचं नाटक करत होते. मात्र घनश्याम माझ्यावर सोबत राहण्यासाठी दबाव आणू लागला. त्यानंतर मी रोहितसोबत मिळून त्याची हत्या करण्याचा डाव आखला.
हत्येच्या रात्री सोनिया आणि रोहित घनश्याम यांना एका निर्जन ठिकाणी घेऊन गेली. तिथे रोहितने घनश्याम यांच्या डोक्यावर लोखंडी सळईने वार करून त्याला बेशुद्ध केले. त्यानंतर या दोघांनीही त्याच्या शरीरावर तेल टाकून पेटवून दिले. पोलिसांनी घटनास्थळावरून रक्ताने माखलेले कपडे, लोखंडी सळई, आगपेटी आणि तेलाची बाटली जप्त केली. सध्या दोन्ही आरोपींना अटक करण्यात आली आहे. तसेच या प्रकरणाचा पुढील तपास केला जात आहे.