अहमदाबाद, दि. 5- गुजरातमधील बनासकांठामध्ये पूरग्रस्तांना भेटण्यासाठी गेलेल्या राहुल गांधी यांच्या गाडीवर हल्ला झाला होता. या हल्ल्याच्या मागे भाजपा असल्याची टीका काँग्रेसचे उपाध्यक्ष राहुल गांधी यांनी केली आहे. राहुल गांधी यांनी दगडफेकीच्या या घटनेवरून भाजपा आणि पंतप्रधान नरेंद्र मोदी यांच्यावर सडकून टीका केली आहे. राहुल गांधी यांनी या मुद्द्यावर शनिवारी प्रतिक्रिया दिली. माझ्यावर हल्ला करणारे भाजप आणि राष्ट्रीय स्वयंसेवक संघाचे कार्यकर्ते होते आणि त्यांची व पंतप्रधान नरेंद्र मोदी यांची राजकारण करण्याची हीच पद्धत आहे, त्यावर काय बोलू शकतो?असा थेट आरोप राहुल यांनी केला. या, संपूर्ण प्रकरणावर पंतप्रधान मोदींनी प्रतिक्रिया दिलेली नाही. हा प्रश्न पत्रकारांनी विचारल्यावर राहुल गांधी म्हणाले, ज्यांनी हा हल्ला घडवून आणला, ते स्वतः याची निंदा कशी करतील.
नेमकं प्रकरण काय ?गुजरात दौ-यावर असलेल्या राहुल गांधी यांच्या गाडीवर धनेरा येथील लाल चौकात हा हल्ला करण्यात आला . काँग्रेसने या हल्ल्यामागे भाजपा कार्यकर्ता असल्याचा आरोप केला आहे. भाजपाने मात्र हे आरोप फेटाळून लावत काँग्रेसला आमच्यावर आरोरप करायची सवय झाली आहे असं म्हटलं आहे. बनासकाठामध्ये राहुल गांधी म्हणाले, मी तुम्हा सर्वांमध्ये येऊ इच्छितो, काँग्रेस पक्ष हा तुमच्यासोबत आहे. मी पूरग्रस्तांच्या सोबत आहे. तत्पूर्वी काँग्रेस उपाध्यक्ष राहुल गांधींनी राजस्थानमधील जालोर जिल्ह्यातील पूरग्रस्त लोकांशी बातचीत केली होती. मुसळधार पावसामुळे अनेक ठिकाणी पूरग्रस्त स्थिती उद्भवली आहे. मोठ्या संख्येनं लोक पुरात अडकले आहेत. त्यांना वाचवण्यासाठी एनडीआरएफची टीम काम करतेय. तत्पूर्वी पंतप्रधान नरेंद्र मोदींनी सुद्धा गुजरातच्या पूरग्रस्त स्थितीची पाहणी केली होती.