गुजरातमध्ये एक हृदयद्रावक घटना समोर आली आहे. सुरतजवळील नवसारी जिल्ह्यात असलेल्या तपोवन संस्कार धाममध्ये शिकणाऱ्या १३ वर्षांच्या मुलाचा हार्ट अटॅकने मृत्यू झाला. महाराष्ट्रातील रहिवासी मेघ जैन हा तीन वर्षांपासून तपोवन संस्कार धाममध्ये शिक्षण घेत होता. हार्ट अटॅक येण्यापूर्वी विद्यार्थ्याच्या छातीत दुखत होतं पण त्याचा जीव वाचवता आला नाही. तो वेदनेने तडफडत राहिला. ही घटना सीसीटीव्ही फुटेजमध्येही कैद झाली आहे.
२५ मे रोजी रात्री तपोवन संस्कार धाममध्ये मुलासोबत धक्कादायक घटना घडली आहे. मेघ जैनचं कुटुंब महाराष्ट्रातील नंदुरबार जिल्ह्यातील शहादा येथे राहतं. सीसीटीव्ही फुटेजमध्ये असं दिसून आलं आहे की, विद्यार्थ्याला वेदना होत होत्या आणि घटनास्थळी उपस्थित असलेला वसतिगृहातील स्टाफ त्याच्यासोबत जवळच बसून राहिला.
प्राथमिक तपासात असं दिसून आलं आहे की स्टाफला वाटलं की, मुलाच्या छातीत दुखणं हे गॅस आणि अ‍ॅसिडिटीमुळे होत असेल. यामुळे त्यांनी विशेष लक्ष दिलं नाही. आश्रम व्यवस्थापनाने निष्काळजीपण दाखवणाऱ्या सहाय्यकाला निलंबित केलं आहे. हार्ट अटॅकमुळे जीव गमावलेला मेघ जैन हा तपोवन संस्कार धाम येथे नववीत शिकत होता. त्याच्या मृत्यूने सर्वांनाच मोठा धक्का बसला आहे.
मेघ जैनचे वडील सचिन भन्साळी आणि काका अतुल भन्साळी हे मूळचे खेतियाचे रहिवासी आहेत परंतु सध्या ते महाराष्ट्रातील शहादा येथे राहतात, जिथे ते गिफ्ट शॉप चालवतात. मुलाच्या मृत्यूमुळे कुटुंबात शोककळा पसरली आहे. नवसारी ग्रामीण पोलिसांनी दिलेल्या माहितीनुसार, मेघ जैनचा व्हिसेरा तपासणीसाठी एफएसएलमध्ये पाठवण्यात आला आहे. रिपोर्ट आल्यानंतरच मृत्यूचे खरं कारण कळेल. याआधी गुजरातमध्ये अशा घटना घडल्या आहेत.