उत्तर प्रदेशच्या लखनऊमधील दुबग्गाच्या सैदपूर महरी गावात एक धक्कादायक घटना घडली आहे. तीन दिवसांपूर्वी मृत पावलेल्या चिमुकल्याचा मृतदेह कबर खोदून बाहेर काढण्यात आला. आजीने स्वप्नात तिचा नातू अक्षय हा जिवंत असल्याचं पाहिलं. 3 दिवसांपूर्वीच मुलाचा मृत्यू झाला होता. आजीने स्वप्नात अक्षत जिवंत असल्याचं पाहिल्यावर कबर पुन्हा खणण्यात आली आणि अक्षयचा मृतदेह बाहेर काढण्यात आला.
मिळालेल्या माहितीनुसार, 14 जानेवारीला सैदपूर महरी गावात राहणाऱ्या 3 वर्षीय अक्षयला अचानक उलट्या होऊ लागल्या. कुटुंबीयांनी त्याला जवळच्या खासगी रुग्णालयात दाखल केलं. तिथल्या डॉक्टरांनी त्याला मृत घोषित केलं. यानंतर कुटुंबीयांनी त्याचा मृतदेह गावाबाहेर दफन केला. विधीवत अंत्यसंस्कार करून कुटुंबीय, नातेवाईक घरी निघून गेले. पण तीन दिवसांनी भलतंच घडलं.
आजीला तीन दिवसांनी पडलेल्या स्वप्नात अक्षय जिवंत असल्याचं दिसलं. आजीने कुटुंबीयांना अक्षय जिवंत असल्याचं सांगितलं. त्यानंतर नातेवाईकांनी पुन्हा एकदा खरच अक्षय जिवंत असेल या आशेने कबर खणली. त्याआधी तिथे पूजा केली. अक्षयचा मृतदेह बाहेर काढला आणि लखनऊच्या बलरामपूर रुग्णालयात नेला. डॉक्टरांनी मृतदेह पाहिला आणि चिमुकल्याचा मृत्यू झाला असल्याचं सांगितलं. मात्र कुटुंबीय ऐकून घेत नव्हते.
अक्षयचे नातेवाईक ऐकत नसल्याचं पाहून रुग्णालय प्रशासनाने घटनेची माहिती पोलिसांना दिली. पोलीस रुग्णालयात पोहोचले. त्यांनी कुटुंबाची परिस्थिती पाहिली आणि सहानुभूती म्हणून डॉक्टरांना पुन्हा एकदा अक्षयच्या मृतदेह पाहण्यास सांगितलं. डॉक्टरांनी अक्षयचे पल्सेस चेक केले. हार्ट बीट चेक करण्यासाठी ईसीजी मशीन लावली. मात्र मुलाकडून कोणताच प्रतिसाद मिळाला नाही. कारण 3 दिवसांपूर्वीच त्याचा मृत्यू झाला होता. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"