Video - अग्निकल्लोळ! गरीब रथ एक्स्प्रेसला भीषण आग; डबा जळून खाक, प्रवाशांना वाचवण्यात यश

अमृतसरहून सहरसा येथे जाणाऱ्या गरीब रथ एक्स्प्रेसमध्ये अचानक भीषण आग लागली, ज्यामुळे प्रवाशांमध्ये भीतीचे वातावरण निर्माण झाले.

पंजाबमधील सरहिंद रेल्वे स्टेशनजवळ आज एक मोठी दुर्घटना टळली आहे. अमृतसरहून सहरसा येथे जाणाऱ्या गरीब रथ एक्स्प्रेसमध्ये अचानक भीषण आग लागली, ज्यामुळे प्रवाशांमध्ये भीतीचे वातावरण निर्माण झाले. अंबालापासून अर्धा किलोमीटर अंतरावर असलेल्या सरहिंद स्टेशनजवळ ट्रेन येताच ही घटना घडली. एका डब्यातून धूर येत असल्याचं पाहून प्रवाशांनी तात्काळ रेल्वे कर्मचाऱ्यांना सूचना दिल्या. यानंतर सावधगिरी बाळगत ट्रेन लगेचच थांबवली, ज्यामुळे मोठी दुर्घटना टळली.

सकाळी ७:३० च्या सुमारास ही घटना घडली. रेल्वे अधिकाऱ्यांन दिलेल्या माहितीनुसार, सर्व प्रवासी सुरक्षित आहेत आणि कोणतीही जीवितहानी किंवा दुखापत झाली नाही. आगीचं कारण अद्याप स्पष्ट झालेलं नाही, परंतु तांत्रिक बिघाड किंवा शॉर्ट सर्किट झाल्याचं म्हटलं जात आहे.

आग नियंत्रणात आल्यानंतर रेल्वेची स्थिती तपासली जात असल्याचं अधिकाऱ्यांनी सांगितलं. नुकसान झालेल्या डब्याची तपासणी केल्यानंतर, ट्रेन लवकरच सहरसा येथे रवाना होईल. रेल्वे सुरक्षा दल (आरपीएफ) आणि जीआरपी पथकांनी संपूर्ण परिसराला वेढा घातला आहे आणि प्रवाशांना सर्व आवश्यक सुविधा पुरवल्या जात आहेत.

प्रवाशांमध्ये भीतीचे वातावरण होते, परंतु सुरक्षा कर्मचाऱ्यांच्या तत्परतेमुळे दिलासा मिळाला. आगीची बातमी पसरताच, प्रवाशांना काही काळासाठी भीती वाटली, परंतु रेल्वे आणि अग्निशमन दलाच्या कर्मचाऱ्यांच्या तत्पर कृतीमुळे परिस्थिती नियंत्रणात आली. रेल्वे कर्मचाऱ्यांची तत्परता आणि अग्निशमन दलाच्या प्रतिसादामुळे संभाव्य मोठी आपत्ती टळली.

भारतीय रेल्वेने ट्विटरवर या घटनेची माहिती दिली, जिथे आयआरने पोस्ट केलं की, आज सकाळी सरहिंद स्टेशनवर ट्रेन क्रमांक १२२०४ (अमृतसर-सहरसा) च्या एका डब्यात आग लागली. रेल्वे कर्मचाऱ्यांनी तातडीने सर्व प्रवाशांना सुरक्षित ठिकाणी हलवले आणि आग विझवली. कोणतीही दुखापत झाली नाही. हा डबा वेगळा करण्यात आला आहे.