सिवान – बिहारच्या सिवान इथं एका मुलाने प्रेयसीसाठी धर्म बदलून सरवन चौहानचा साहिल अली बनला आहे. इतकेच नाही तर त्याने स्वत:चा लूकही बदलला आहे. सध्या तो एका मदरशात मौलवी बनला आहे. सरवनचा नवा लूक जेव्हा त्याच्या प्रेयसीने सर्वांना दाखवला तेव्हा सर्वच हैराण झाले. पाहता पाहता हा फोटो सोशल मीडियावर व्हायरल झाला. प्रेयसीच्या प्रेमाच्या जाळ्यात अडकवून सरवनला फसवलं असा आरोप त्याचे नातेवाईक करतात. आता हे प्रकरण पोलीस ठाण्यात पोहचले आहे.
सिवानच्या मैरवा बाजार येथील हा प्रकार आहे. माहितीनुसार, सरवनचे वडील प्रदीप चौहान गोपालगंज जिल्ह्यातील हरपूर गावातून ९ वर्षापूर्वी मुलांच्या शिक्षणासाठी सिवानला येऊन राहायला लागले. सरवन हा ३ भावंडांमध्ये सर्वात मोठा आहे. मैरवा इथं एका दुकानावर तो काम करायचा. ३-४ वर्षापूर्वी त्याच परिसरातील रोजी नावाच्या मुलीसोबत त्याची ओळख झाली. हळूहळू त्यांच्या ओळखीचं प्रेमात रुपांतर झाले. सरवनला रोजीसोबत लग्न करून आयुष्य घालवायचे होते. परंतु रोजी आणि सरवन यांच्या धर्माची भिंत उभी होती. त्यामुळे रोजीच्या प्रेमाखातीर सरवन साहिल अली बनला.
कुटुंबाचा प्रेयसी रोजीवर आरोप
आई नैनादेवी म्हणाली की, सरवनला धर्म परिवर्तन करून त्याच्या प्रेयसीने गायब केले. रोजी खातून या मुलीने सरवनला प्रेमाच्या जाळ्यात ओढत ७ महिन्यापूर्वी पळवून नेले. त्यानंतर धर्मपरिवर्तन करून त्याला मौलाना बनवले. त्यानंतर एका मदरशात त्याला ठेवले. रोजीनेच मुलाचा मौलाना बनलेला फोटो परिसरात व्हायरल केला. आता सरवनच्या आईने मुलाला परत आणण्यासाठी प्रशासनाकडे मदतीची याचना केली आहे.
या प्रकरणात रोजी खातूनने सरवन केवळ आपला मित्र होता. त्याच्याबद्दल मला काहीच माहिती नव्हते. सरवन अल्पवयीन नाही. त्याला आयुष्यात काय करायचे आणि काय नाही याची समज आहे. तो त्याच्या आईच्या मर्जीनेच लग्न करेल असं रोजीनं म्हटलं. सरवन चौहानने नाव बदलून साहिल अली केले आहे. त्याबाबत प्रतिज्ञापत्र बनवून आधार कार्डवरील नावही बदलले आहे. या प्रकरणी आता सरवनने उर्फ साहिलने एक व्हिडिओ जारी केला. ज्यात स्वत:च्या मर्जीने धर्मपरिवर्तन केल्याचे सांगितले आहे. सध्या या प्रकरणी पोलीस तपास करत आहेत.