ऑनलाइन लोकमत -
नवी दिल्ली, दि. 02 - दिल्ली पोलिसांनी इंदिरा गांधी आंतरराष्ट्रीय विमानतळावरुन महिलेला तिच्या 5 वर्षाच्या मुलासह ताब्यात घेतलं आहे. या महिलेची ओळख पटली असून यास्मीन मोहम्मद असं तिचं नाव आहे. यास्मीन बिहारची राहणारी आहे. यास्मीन अफगाणिस्तानला जात असताना तिला ताब्यात घेण्यात आलं आहे. यास्मीन इसीस या दहशतवादी संघटनेत भरती होण्यासाठी जात असल्याच्या संशयावरुन अटक करण्यात आली आहे.
यास्मीन मुलासहित काबूलला जाणा-या विमानाने प्रवास करणार होती असं वृत्त इंडियन एक्स्प्रेसने दिलं आहे. मिळालेल्या वृत्तानुसार यास्मिन केरळमधून बेपत्ता झालेल्या 21 तरुणांपैकी एका तरुणाच्या संपर्कात होती. केरळमधील बेपत्ता झालेले काही तरुण इसीसमध्ये भरती झाले असल्याचा संशय आहे.
यास्मीन घटस्फोटीत आहे. तिला दिल्ली पोलिसांच्या विशेष पथकाच्या हवाली करण्यात आलं होतं, त्यानंतर केरळ पोलिसांनी तिची कस्टडी घेतली आहे. केरळ न्यायालयाने यास्मिनला न्यायालयीन कोठडीत पाठवलं आहे.