जम्मू काश्मीरमदील अनंतनाग जिल्ह्यामध्ये भारतीय लष्कर आणि दहशतवाद्यांमध्ये झालेल्या चकमकीत दोन जवानांना वीरमरण आलं आहे. तर तीन जवान जखमी झाल्याचं वृत्त आहे. अधिकाऱ्यांनी सांगितले की, जखमी जवानांना रुग्णालयात दाखल करण्यात आले असून, दहशतवाद्यांचे पळून जाण्याचे सर्व मार्ग बंद करण्यात आले आहे.
पोलिसांनी याबाबत अधिक माहिती देताना सांगितले की, अनंतनाग जिल्ह्यातील कोकरानाग येथील अहलान परिसरामध्ये दहशतवादी आणि लष्करादरम्यान, चकमक सुरू आहे. पोलीस आणि लष्कराच्या एका पथकाने गोपनीय माहितीच्या आधारावर अहलान येथे नाकेबंदी केली. तसेच शोधमोहीम हाती घेतली.
त्यांनी पुढे सांगितले की, शोधमोहिमेदरम्यान, लपलेल्या दहशतवाद्यांनी सुरक्षादलांच्या दिशेने गोळीबार सुरू केला. त्यामुळे चकमकीला तोंड फुटले. गोळीबार अद्यापही सुरू आहे. जम्मू काश्मीरमधून दहशतवाद संपुष्टात आणण्यासाठी सुरक्षा दलांकडून दहशतवादी आणि त्यांना आश्रय देणाऱ्यांविरोधात कठोर कारवाई सुरू आहे.