‘ई-नाम’ पोर्टल : आणखी ५४ बाजार समित्या ऑनलाईन, शेतमालाची देशव्यापी बाजारपेठ   

आता ‘ई-नाम’मध्ये देशभरातील ९६२ मंडईतील शेतमालाची आॅनलाईन खरेदी-विक्री करता येऊ शकेल. कोरोनाच्या पार्श्वभूमीवर तंत्रज्ञानाचा हा नवा पर्याय खुला झाला आहे.

नवी दिल्ली : महाराष्ट्रातील ५४ नव्या कृषी उत्पन्न बाजार समित्यांसह १० राज्यांमधील आणखी १७७ बाजार समित्या (मंडी) सोमवारी ‘ई-नाम’ या शेतमालाच्या देशाव्यापी आॅनलाइन बाजारपेठेशी जोडल्या गेल्या. यामुळे आता ‘ई-नाम’मध्ये देशभरातील ९६२ मंडईतील शेतमालाची आॅनलाईन खरेदी-विक्री करता येऊ शकेल. कोरोनाच्या पार्श्वभूमीवर तंत्रज्ञानाचा हा नवा पर्याय खुला झाला आहे.केंद्रीय कृषीमंत्री नरेंद्र सिंग तोमर यांनी आॅनलाइन कार्यक्रमात या नव्या बाजार समित्यांना ‘ई-नाम’ पोर्टलशी जोडून घेतले. या ई-बाजारपेठेला अधिक बळकटी देण्यावर तोमर यांनी भर दिला. आणखी १५ राज्यांमधील आणखी ४१५ बाजार समित्या १५ मेपर्यंत सामील झाल्यावर ‘ई-नाम’वरील मंड्यांची संख्या एक हजाराहून अधिक होईल व ‘एक देश, एक बाजारपेठ’ हे पंतप्रधान नरेंद्र मोदींचे स्वप्न पूर्ण होईल, असा विश्वास त्यांनी व्यक्त केला.प्रगत माहिती तंत्रज्ञानाचा वापर करून शेतकऱ्यांना त्यांच्या शेतमालासाठी देशव्यापी बाजारपेठ उपलब्ध व्हावी यासाठी केंद्र सरकारने एप्रिल २०१६ पासून ‘ई-नाम’ हे पोर्टल सुरु केले.150 प्रकारचा अन्नधान्य, भाजीपाला, फळे, यासह शेतमाल या बाजारात विकला जातो.1005 उत्पादक संस्थाही (एफपीओ) शेतकऱ्यांनी स्थापन केलेल्या या बाजारपेठेत सामील आहेत.7.92 कोटी रुपयांची त्यांनी आतापर्यंत उलाढाल केली आहे.