सर्वसाधारणपणे भाविक मंदिरात येऊन देवासमोर आपली विविध गाऱ्हाणी मांडत असतात. आजारपणाच्या प्रसंगी व्याधीतून मुक्तता मिळून दीर्घायुष्य प्राप्त व्हावे, असं मागणं देवाकडे मांडतात. मात्र विविधतेने भरलेल्या आपल्या देशात असंही एक मंदिर आहे जिथे भाविक दीर्घायुष्य नाही तर मृत्यूची मागणी करण्यासाठी येतात. हे मंदिर मध्य प्रदेशमधील उज्जैन येथे आहे. धर्मराज आणि चित्रगुप्त मंदिर असं या मंदिराचं नाव असून, येथे भाविक मृत्यूची मागणी करण्यासाठी येतात.
मध्य प्रदेशमधील उज्जैन शहराचं धार्मिक महत्त्व मोठं आहे. येथील वातावरणात शिवशंकराचा वास आहे, असं मानलं जातं. उज्जैनमध्ये अशी अनेक मंदिरं आहेत ज्यांचं आगळंवेगळं महत्त्व आहे. त्यापैकीच हे धर्मराज आणि चित्रगुप्त मंदिर आहे. येथे भाविक मृत्यूची मागणी करण्यासाठी येतात. येथे संबंधित व्यक्तीच्या नावाने दिवा पेटवावा लागतो. त्यानंतर २४ तासांच्या आत व्यक्ती मोक्षप्राप्ती करते, अशी आस्था आहे.
हे मंदिर शिप्रा नदीवरील रामघाट येथे आहे. धर्मराज आणि चित्रगुप्त मंदिर असं नाव असलेल्या या मंदिरामध्ये धर्मराज आणि चित्रगुप्त या दोन्ही देवता विराजमान आहेत. येथे दररोज शेकडो भाविक आपलं मागणं मागण्यासाठी येतात. या मंदिरात पूजाविधी केल्यानंतर अनेक लोकांची प्रकृती सुधारल्याचे सांगण्यात येते. येथे लावलेला तुपाचा दिवा धर्मराज आणि चित्रगुप्त यांना प्रसन्न करतो, अशी श्रद्धा.
या मंदिराबाबत अधिक माहिती देताना जाणकारांनी सांगितले की, ज्या व्यक्तीला शारीरिक त्रास होत आहे, अशी व्यक्ती प्रकृतीच्या स्वास्थ्यासाठी किंवा मोक्ष मिळावा यासाठी येथे येऊन तुपाचा दिवा लावते. असे केल्याने त्रास दूर होतो आणि मोक्ष मिळतो अशी श्रद्धा आहे. त्यामुळे येथे हजारो भाविक येथे येतात.