ऑनलाइन लोकमत
नवी दिल्ली, दि.12- अंडरवर्ल्डचा कुख्यात डॉन दाऊद इब्राहिमसोबत त्याच्याच माणसाने 'गेम' केला आहे. स्वतःच्याच गॅंगवरील दाऊदची जरब आता कमी झाली आहे. त्याच कारण म्हणजे अंडरवर्ल्डच्या या डॉनला त्याच्याच माणसाने करोडो रूपयांना चुना लावल्याचं समोर आलं आहे. त्यामुळे दाऊदची भीती आता त्याच्या माणसांनाही वाटत नसल्याचं दिसतंय. दाऊदचा सहकारी खलीक अहमद याने दाऊदला तब्बल 45 कोटी रूपयांना फसवलं असून तो सर्व पैशांसकट फरार झाला आहे.
गुप्तचर यंत्रणेच्या सुत्रांकडून मिळालेल्या माहितीनुसार, खलीक अहमदला दिल्लीच्या एका 'प्रतिष्ठित' व्यक्तिकडून 45 कोटींची रक्कम घ्यायची होती. यातील 40 कोटी हवालाद्वारे परदेशात पाठवायचे होते. या कामासाठी खलीकला 5 कोटी रूपये बक्षिस म्हणून मिळणार होते. मात्र, ४० कोटी दाऊदला न पाठवता संपूर्ण ४५ कोटी रुपये घेऊन खलीक गायब झाला आहे. गबन खुलासा, जाबिर मोती आणि खलीक अहमद यांचे फोन टॅप केल्यानंतर गुप्तचर विभागाला ही माहिती मिळाली. मोती हा पाकिस्तानातील दाऊदचा 'खास' माणूस आहे. तर अहमदचं भारत आणि शारजा दरम्यान सातत्याने येणंजाणं असतं.
मोतीने खलीकला फोनकरून दाऊदचा सहकारी रजत भाई याचं नाव घेऊन पैशांबाबत विचारणा केल्याचं समोर आलं आहे. गुप्तचर यंत्रणेच्या माहितीनुसार, दाऊदची दोन माणसं खलीकचा शोध घेत आहेत. खलीकला पकडण्यासाठी 26 नोव्हेंबर 2015 ला हे दोघे दिल्लीहून कॅनडालाही गेले होते. दाऊदसोबत फ्रॉड केल्यानंतर खलीक अहमद मणिपूरमध्ये लपल्याचे सांगितले जात आहे.