SIRचं टार्गेट पूर्ण करणाऱ्या BLOची बल्ले बल्ले, बक्षीस म्हणून मिळतंय सिनेमाचं तिकीट, हेलिकॉप्टर राईड आणि बरंच काही  

SIR In Madhya Pradesh: एसआयआरचं काम मुदतीआधीच पूर्ण करून कार्यक्षमतेचं उदाहरण प्रस्तुत करणाऱ्या बीएलओंना जिल्हा प्रशासनाकडून सन्मानित करून बक्षीसही दिलं जात आहे. मध्य प्रदेशमध्ये एसआयआरचं टार्गेट वेळेपूर्वीच पूर्ण करणाऱ्या सुपर बीएलओंना टायगर सफारी, चित्रपटांचं तिकीट आणि हेलिकॉप्टर राईड अशी आकर्षक बक्षीसं दिली जात आहेत.  

सध्या देशातील काही राज्यांमध्ये निवडणूक आयोगाकडून मतदार यादी पुनरीक्षणाचं (SIR) काम सुरू आहे. हे काम पूर्ण करण्याची जबाबदारी असलेल्या बुथ लेव्हल ऑफिसरवर मोठ्या प्रमाणात दबाव येऊन त्यांच्यापैकी काहींनी जीवन संपवल्याच्या बातम्या येत आहे. मात्र दुसरीकडे एसआयआरचं काम मुदतीआधीच पूर्ण करून कार्यक्षमतेचं उदाहरण प्रस्तुत करणाऱ्या बीएलओंना जिल्हा प्रशासनाकडून सन्मानित करून बक्षीसही दिलं जात आहे. मध्य प्रदेशमध्ये एसआयआरचं टार्गेट वेळेपूर्वीच पूर्ण करणाऱ्या सुपर बीएलओंना टायगर सफारी, चित्रपटांचं तिकीट आणि हेलिकॉप्टर राईड अशी आकर्षक बक्षीसं दिली जात आहेत.  

मध्य प्रदेशातील जबलपूर येथील स्नेहलता पटेल या त्यांच्या अधीन असलेल्या सर्व बुथवर १०० टक्के डिजिटायझेशनचं काम पूर्ण करणाऱ्या जिल्ह्यातील पहिल्या बीएलओ सुपरवायझर बनल्या आहेत. त्यांनी निर्धारित वेळेपूर्वीच पनागर विधानसभा मतदारसंघातील ७ हजार ७०६ मतदारांचे अर्ज भरून सर्वांना आश्चर्याचा धक्का दिला आहे.

जबलपूरचे जिल्हाधिकारी राघवेंद्र सिंह यांच्या सूचनेनुसार स्नेहलता पटेल यांना बक्षीस म्हणून पीएम श्री हेली पर्यटन सेवेच्या माध्यमातून जगप्रसिद्ध पर्यटन स्थळ असलेल्या कान्हा आणि बांधवगड येथील जॉय राईड करवण्यात आली. स्नेहलता यांनी जिल्हाधिकाऱ्यांचे आभार मानले असून, सर्व बीएलओंनी आपलं काम पूर्ण निष्ठेने आणि मेहनतीने पूर्ण करावे, असं आवाहन केलं आहे. 

रीवा जिल्ह्यामध्येही १२ बीएलओंनी निवडणूक आयोगाने आखून दिलेल्या वेळेच्या  मर्यादेपूर्वी १४ दिवस आधीच मतदारांच्या गणनेच्या १०० डिजिटायझेशनचं काम पूर्ण केलं आहे. याचं बक्षीस म्हणून सर्व बीएलओंना प्रशस्तीपत्र आणि संपूर्ण कुटुंबासोबत व्हाइट टायगर सफारी, मुकुंदपूर येथे फिरण्याचं आणि चित्रपटाचं तिकीट बक्षीस म्हणून देण्यात आलं. या बारा बीएलओंमध्ये सेमरिया येथील ५, सिरमौर येथील २, हुजूर येथील ४ आणि मनगवां मतदारसंघातील एका बीएलओचासमावेश होता.  याबाबत जिल्हाधिकारी प्रतिभा पाल यांनी सांगितलं की, या बीएलओंनी आपल्या निर्धारित वेळेपूर्वी १४ दिवस आधी आपलं उद्दीष्ट पूर्ण करत एक चांगलं उदाहरण समोर ठेवलं आहे.