छत्तीसगडमध्ये नक्षलवादाच्या विरोधात पोलिसांना मोठे यश मिळाले आहे. नक्षलवादाचा बालेकिल्ला म्हणून ओळखल्या जाणाऱ्या सुकमामध्ये १६ नक्षलवाद्यांनी पोलिसांसमोर आत्मसमर्पण केले. यामध्ये २ कट्टर नक्षलवाद्यांचा समावेश आहे. यातील ६ नक्षलवाद्यांवर २५ लाखांचे बक्षीस जाहीर केले होते. याशिवाय, एका महिला आणि एका पुरूष माओवाद्यावर प्रत्येकी ८ लाख रुपयांचे बक्षीसही होते.
सुकमामध्ये पोलिसांसमोर आत्मसमर्पण करणाऱ्या १६ माओवाद्यांमध्ये अनेक भयानक नक्षलवादी आहेत, त्यांच्याविरोधात अनेक मोठे गुन्हे दाखल आहेत.
सर्व नक्षलवाद्यांनी आत्मसमर्पण धोरण आणि नियाद नेल्ला नर योजनेअंतर्गत आत्मसमर्पण करण्याचा निर्णय घेतला. यावेळी एसपी किरण चव्हाण, एसएसपी उमेश गुप्ता आणि सीआरपीएफसह अनेक पोलिस अधिकारी उपस्थित होते.
सुकमाचे एसपी किरण चव्हाण म्हणाले, सुकमा जिल्ह्यात नक्षलवाद संपवण्याच्या मोहिमेत पोलिस आणि सीआरपीएफकडून सुरू असलेल्या सततच्या प्रयत्नांमुळे प्रभावित होऊन, आज १६ नक्षलवाद्यांनी आत्मसमर्पण केले आहे.
एसपी किरण चव्हाण यांच्या माहितीनुसार, "यापैकी ६ नक्षलवाद्यांवर प्रशासनाने २५ लाखांचे बक्षीस जाहीर केले आहे. बटालियन आणि ओडिशासारख्या इतर विभागातील नक्षलवाद्यांनीही आत्मसमर्पण केले आहे. या नक्षलवाद्यांच्या आत्मसमर्पणानंतर एक गाव पूर्णपणे नक्षलमुक्त झाले आहे, ज्याला प्रशासनाकडून १ कोटी रुपये दिले जातील."