नवी दिल्ली : दिल्ली विधानसभा निवडणुकीचे निकाल जनतेसमोर येण्यास सुरुवात झाली आहे, तर काही तासात निकाल हाती येणार आहे. त्यामुळे दिल्लीच्या विधानसभा निवडणुकीत कोण बाजी मारणार याकडे सर्वांचे लक्ष लागून आहे. निकालातील आकडे पाहता पुन्हा दिल्लीत केजरीवाल सरकार स्थापन होणार असल्याचे बोलले जात आहे. तर मुख्यमंत्री अरविंद केजरीवाल यांच्यासाठी आजचा हा दिवस खास असणार आहे. कारण आजच्या दिवशीच त्यांच्या पत्नी सुनीता केजरीवाल यांचा वाढदिवस असून, मुख्यमंत्री त्यांच्या पत्नीला विजयाची भेट देणार असल्याचे बोलले जात आहे.
सुनीता केजरीवाल यांच्या वाढदिवसात आम आदमी पक्षाच्या संभाव्य विजयाने आनंदाची भर घातली आहे. तर आपचे कार्यकर्ते आणि नेते अरविंद केजरीवाल यांच्या घरी जमा होत असून, त्यांना मुख्यमंत्री पदाच्या तर त्यांच्या पत्नीला वाढदिवसाच्या शुभेच्छा देताना दिसत आहे. त्यामुळे केजरीवाल कुटुंबात दुहेरी उत्सव पाहायला मिळत आहे.
दिल्ली निवडणूक निकालांमध्ये आपचा विजय झाल्यास दिल्लीमध्ये सलग तिसऱ्यांदा केजरीवाल याचं सरकार बनणार आहे. दिल्लीकरांसाठी 5 वर्षे कामं केल्यामुळे आपचा विजय निश्चित असल्याचं मनीष सिसोदिया यांनी म्हटलं आहे. 'दिल्लीत विजय होणार याबाबत आम्हाला आत्मविश्वास आहे. कारण गेल्या पाच वर्षात आम्ही इथल्या लोकांसाठी काम केली आहेत' असं त्यांनी म्हटलं आहे.