३०... गुन्हे... जोड...०२

(फोटो-उभा)
७३ हजार रुपयांचा मुद्देमाल जप्त
दोघांना अटक : सुगंधित तंबाखूची अवैध वाहतूक
नागपूर : सुगंधित तंबाखू आणि गुटख्याची अवैध वाहतूक करणाऱ्या दोघांना केळवद पोलिसांनी अटक केली. त्यांच्याकडून वाहनासह एकूण ७३ हजार ८१५ रुपये किमतीचा मुद्देमाल जप्त करण्यात आला. ही कारवाई केळवद परिसरात गुरुवारी सायंकाळी ६.४० वाजताच्या सुमारास करण्यात आली.
अमोल चंद्रशेखर कानफाडे (३८) व अजय वासुदेव हलमारे (४२) दोघेही रा. नागपूर अशी अटक करण्यात आलेल्या आरोपींची नावे आहेत. महाराष्ट्रात सुगंधित तंबाखू आणि गुटख्याच्या विक्रीवर राज्य शासनाने बंदी घातली आहे. दरम्यान, मध्य प्रदेशातून नागपूर जिल्ह्यात सुगंधित तंबाखू आणि गुटखा आणला जात असल्याची माहिती केळवद पोलिसांना मिळाली होती. त्यामुळे पेालिसांनी नागपूर - छिंदवाडा महामर्गावरील केळवद परिसरात नाकाबंदी करून वाहनांची कसून तपासणी करायला सुरुवात केली होती.
दरम्यान, एमएच-३१/डीएस-५०८८ क्रमांकाच्या मोटरसायकलवर नागपूरकडे भरधाव जाणाऱ्या दोन तरुणांना थांबवून पोलिसांनी त्यांचीही झडती घेतली. त्यात त्यांच्याजवळ सुगंधित तंबाखू व गुटखा असल्याचे आढळून येताच त्यांना ताब्यात घेतले व तंबाखू, गुटखा व त्यांची मोटरसायकल जप्त केली. या कारवाईमध्ये एकूण १३ हजार ८१५ रुपये किमतीचा तंबाखू व गुटख्यासह ७३ हजार ८१५ रुपये किमतीचा मुद्देमाल जप्त केल्याची माहिती पोलिसांनी दिली.
या प्रकरणी केळवद पोलिसांनी भादंवि २७३, १८८, अन्न सुरक्षा अधिनियम २००६ सहकलम २७ (३), ३० (२) अ अन्वये गुन्हा नोंदवून दोघांनाही अटक केली. ही कारवाई सहायक पोलीस निरीक्षक वाय. एल. पारधी, इस्माईल शेख, विनोद पाटील, अमोल काळे, दिलीप पटले, सचिन राठोड, दिनेश गाडगे आदींनी केली. (प्रतिनिधी)
***