लोकमत न्यूज नेटवर्क
नवी दिल्ली/डेहराडून: क्रिकेटमध्ये एका क्षणाच्या दुर्लक्षानेही झेल सुटतो. यष्टिरक्षण करताना भारताचा स्टार क्रिकेटपटू ऋषभ पंत याला हा अनुभव अनेकवेळा आला असेल, परंतु शुक्रवारी पहाटे कार चालवताना गाडीचा वेग आणि क्षणभराची डुलकी पंतच्या जिवावर बेतता बेतता राहिली. दिल्ली-डेहराडून महामार्गावर त्याची आलिशान कार दुभाजकावर आदळली, सुदैवाने आगीत कार भस्मसात होण्यापूर्वीच तो खिडकीची काच फोडून बाहेर आल्याने बचावला.
आपल्या आईला अचानक भेट देऊन आश्चर्यचकित करण्यासाठी आपल्या मूळ गावी रुरकी येथे जात असलेला २५ वर्षीय ऋषभ अपघातात गंभीर जखमी झाला. त्याच्या डोक्याला, पाठीला आणि पायाला गंभीर दुखापत झाली आहे. मंगलौरमध्ये पहाटे साडेपाचच्या सुमारास झालेल्या अपघातानंतर त्याची प्रकृती स्थिर आहे. हरयाणा परिवहन मंडळाचा बसचा चालक आणि इतर कर्मचाऱ्यांनी ऋषभला जळत्या मर्सिडीज बेंझमधून बाहेर पडण्यास मदत केली, असे हरिद्वारचे वरिष्ठ पोलिस अधीक्षक अजय सिंग यांनी सांगितले.
बरे होण्यास लागू शकतात ६ महिने ते वर्ष...
रुरकी रुग्णालयाच्या आपत्कालीन विभागात पंतवर उपचार करणारे डॉ. सुशील नागर म्हणाले की, पंतला फ्रॅक्चर नसून गुडघ्याच्या स्नायूंना (लिगामेंट) दुखापत झाली आहे. त्यासाठी पुढील चाचण्या कराव्या लागणार आहेत. पूर्ण तंदुरुस्तीसाठी दोन ते सहा महिने लागू शकतात. दरम्यान, त्याला पूर्ण बरे होण्यासाठी ६ महिने ते एक वर्ष लागू शकेल, असा अंदाजही काही तज्ज्ञांनी व्यक्त केला आहे.
लवकर बरा हो...
पंतच्या अपघातानंतर तो लवकरात लवकर बरा व्हावा यासाठी अनेकांनी सोशल मीडियावर संदेश टाकले. त्यात पंतप्रधान नरेंद्र मोदी यांचाही समावेश होता. सचिन तेंडुलकर, वीरेंद्र सेहवाग आणि इतर अनेक सहकाऱ्यांनी त्याला लवकर बरे होण्यासाठी शुभेच्छा दिल्या.
- अपघातामुळे वाहनांच्या सुरक्षेचा मुद्दा उपस्थित झाला आहे. दरम्यान, पंतप्रधान नरेंद्र मोदी यांनी ऋषभ पंतच्या आईशी फोनवर बोलणी करून ऋषभ लवकर बरे होईल, असे म्हटले.
घरापासून केवळ १० किमीवर...
- कारमध्ये एकट्याच असलेल्या पंतला क्षणभर डुलकी लागली आणि १५० किलोमीटर वेगाने जाणारी कार दुभाजकावर धडकली. त्यानंतर कारने पेट घेतला. अपघाताचे ठिकाण त्याच्या घरापासून १० किलोमीटर अंतरावर राहिले होते.
- ऋषभच्या मर्सिडीजने दुसऱ्या एका कारला मागे टाकण्याचा प्रयत्न केला. तेवढ्यात समोर एक खड्डा आला. त्यामुळे त्याची कार ५ फुटांपर्यंत उसळून बसला धडकली... त्यानंतर दुभाजकावर धडकली. त्यामुळे आग लागली, असा दावा प्रत्यक्षदर्शीने केला.
नोटा रस्त्यावर विखुरल्या...
ऋषभ कारमधून उतरला तेव्हा त्याने पैशांनी भरलेली बॅगही बाहेर काढली. त्यावेळी काही नोटा रस्त्यावर विखुरल्या. हरयाणा परिवहन मंडळाच्या बसचालकाने नोटा जमा करून ऋषभला दिल्या, असे सांगण्यात आले.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"