द्वारका परिसरातून ११ लाखांचा सुगंधित तंबाखूचा साठा जप्त

अन्न व औषध प्रशासनाची कारवाई : भद्रकाली गुन्हा दाखल
नाशिक : राज्य शासनाने गुटखा व सुगंधित तंबाखूवर बंदी करूनही शहरात सर्रासपणे गुटखा विक्री सुरूच आहे़ द्वारका परिसरातील हरिहर कॉलनीमध्ये अन्न व औषध प्रशासनाने गुरुवारी (दि़३) सायंकाळी टाकलेल्या छाप्यात सुमारे अकरा लाखांची सुगंधित तंबाखू व गुटख्याचा साठा जप्त केला आहे़
अन्न व औषध प्रशासनाच्या अधिकार्‍यांना मिळालेल्या माहितीनुसार त्यांनी गुरुवारी सायंकाळी पाच वाजेच्या सुमारास नासर्डी पूल भागातील हरिहर कॉलनी, कस्तुरी पार्क येथील गाळा क्रमांक २ व ३ वर छापा टाकला़ या ठिकाणी दहा लाख ९१ हजार रुपये किमतीचे मिराज तंबाखूचे पाकिटे, हिरा गुटख्यात मिक्स करण्यासाठी वापरली जाणारी हिरा रॉयल तंबाखू हजारो पाकिटे जप्त केली आहे़
राज्यात प्रतिबंधित असलेल्या तंबाखू व गुटख्याचा साठा करून व्यापारी नफा कमवित आहेत़ तसेच हा प्रकार कुणाच्या लक्षात येऊ नये म्हणून अशा प्रकारे त्यांचा साठा केला जातो आहे़ या प्रकरणी अन्न व औषध प्रशासनाचे विवेक पंढरीनाथ पाटील यांनी दिलेल्या फिर्यादीनुसार भद्रकाली पोलिसांनी अन्न व सुरक्षा मानके कायद्यान्वये अज्ञात व्यापार्‍यांविरुद्ध गुन्हा दाखल केला आहे़ (प्रतिनिधी)