येवला : येथील नगरपालिका कर्मचाऱ्यांचे प्रश्न उपनगराध्यक्ष सूरज पटणी, सर्वपक्षीय नगरसेवकांच्या बैठकीत मार्गी लागल्याने कर्मचारी संघटनेने समाधान व्यक्त केले आहे.
उपनगराध्यक्ष पटणी, मुख्याधिकारी संगीता नांदूरकर यांच्याशी म्युनिसिपल कामगार संघटनेच्या पदाधिकाऱ्यांनी कर्मचाऱ्यांच्या प्रलंबित मागण्यांबाबत महत्त्वपूर्ण बैठकीत कर्मचाऱ्यांना महागाई भत्ता फरक, तसेच कंत्राटी कामगारांचे जुलै महिन्याचे वेतन रक्षाबंधन सणाअगोदर देण्याची मागणी तत्काळ मान्य करून महागाई भत्त्याची रक्कम त्वरित कर्मचाऱ्यांच्या खात्यात जमा करण्यात आली.
नगर परिषदेतील अधिकारी व कर्मचाऱ्यांना कोरोना योद्धे म्हणून प्रशस्ती पत्र देऊन सन्मानित करण्यात आले. बैठकीस म्युनिसिपल कामगार संघटनेचे अध्यक्ष श्याम लोंढे, सरचिटणीस तुषार लोणारी, खजिनदार विजय झाल्टे, संघटक रूपेश तेजी, सहखजिनदार धनराज ढिकले आदींसह सदस्य उपस्थित होते.