नाशिक : पुढील वर्षी भरणारा कुंभमेळा हा जागतिक दर्जाचा सोहळा असणार आहे. त्यामुळे वर्षभर येणाऱ्या भाविकांचा आणि पर्वणीच्या दिवशी वाढणारा ताण लक्षात घेऊन महापालिकेने मूलभूत सेवांचे नियोजन केले आहे. त्यानुसार पाणीपुरवठ्यात ७२ दशलक्ष लिटर्सने वाढ करण्यात येणार आहे. त्याचबरोबर येणाऱ्या भाविकांच्या आरोग्याच्या दृष्टीने विशेष काळजी घेण्यात येणार असून, वैद्यकीय केंद्रांची व्यवस्था करण्यात येणार आहे. महापौर अ‍ॅड. यतिन वाघ यांनी ही माहिती दिली.नाशिकमध्ये भरणाऱ्या कुंभमेळ्याचे नियोजन करण्यात आले असून, त्यानुसार कामे सुरू करण्यात आली आहेत. यंदाच्या कुंभमेळ्यात तीन ते साडेतीन लाख भाविक येतील; परंतु त्याचबरोबर पर्वणी काळ आणि अन्य महत्त्वाचे दिवस बघता सव्वा कोटी भाविक येतील, असा यंत्रणांचा अंदाज आहे. २०११ च्या जनगणनेनुसार नाशिकची लोकसंख्या सध्या १५ लाख आहे. त्याचा विचार केला तर सात ते आठ पटीने अधिक नागरिक या शहरात येणार असल्याने नागरी सोयीसुविधांवर ताण पडणार असून, त्याचदृष्टीने नियोजन करण्यात आले आहे. कुंभमेळ्यात म्हणजे पुढील वर्षापर्यंत म्हणजे २०१५ पर्यंत नाशिकची लोकसंख्या १८ लाख असेल. शहराची सध्याची अनुमानित पाण्याची मागणी ३७० दशलक्ष लिटर्स असून, साधुग्रामकरिता अनुमानित मागणी ३० दशलक्ष लिटर्स इतकी आहे. कुंभमेळ्याची पर्वणी आणि अन्य दिवसांचा विचार करता ७२ दशलक्ष लिटर्स पाणी प्रतिदिन लागणार आहे. म्हणजेच एकूण ४७२ दशलक्ष लिटर्स पाणीपुरवठा रोज केला जाणार असल्याची माहिती महापौर अ‍ॅड. यतिन वाघ यांनी दिली. पालिकेच्या कुंभमेळा आराखड्यात पाणीपुरवठ्यासाठी ९६ कोटी रुपयांची तरतूद असून, त्यानुसार कामे सुरू आहेत. नाशिकरोड जलशुद्धिकरण केंद्राची क्षमता १८ दशलक्ष लिटर्सने, तर पंचवटी विभागातील जलशुद्धिकरण केंद्रांची क्षमता ५० दशलक्ष लिटर्सने वाढविण्यात येणार आहे. साधुग्रामसाठी तर विशेष व्यवस्था करण्यात येणार असून, त्यादृष्टीने दोन जलकुंभ बांधणी व अन्य नियोजन सुरू आहे. कुंभमेळ्याच्या पार्श्वभूमीवर नाशिक पूर्व विभाग, पंचवटी, सातपूर येथे प्रत्येकी एकेक, तर नाशिकरोड येथे तीन आणि सिडकोत आठ जलकुंभ बांधण्याचे काम सुरू असल्याचे ते म्हणाले.नाशिक येथे येणाऱ्या भाविकांचा विचार केला, तर ते केवळ स्नान करून जातील असे नाही. काही भाविक पर्वणीच्या व्यतिरिक्तदेखील येणार असल्याने त्याचे नियोजन करण्यात येत असून, शहरातील धर्मशाळांखेरीज पालिकेच्या शाळा इमारती, समाजमंदिरे, तसेच विविध मंगल कार्यालयांमध्ये व्यवस्था करण्यात येणार आहे. शहरात मंगल कार्यालये आणि लॉन्स मोठ्या प्रमाणात असून, त्यांनी सेवाभावी वृत्तीने ती द्यावीत अशी अपेक्षा आहे. तसे झाल्यास निवासाचा मोठा प्रश्न सुटणार आहे, असे सांगून महापौर म्हणाले, कुंभमेळ्यात आरोग्य व्यवस्था हा एक मोठा आव्हानात्मक भाग राहणार आहे. दहा हजार तात्पुरती शौचालये बांधण्याबरोबरच स्वच्छतेसाठी खास व्यवस्था केली जाणार आहे. त्याचबरोबर येणाऱ्या साधू-महंतांसाठी साधुग्राममध्ये तात्पुरत्या स्वरूपात रुग्णालयाची व्यवस्था असेलच; शिवाय अन्यत्रदेखील वैद्यकीय व्यवस्था असेल. त्यानुसार प्रतिबंधात्मक वैद्यकीय सेवेअंतर्गत शहरी आरोग्य केंद्र नऊ, प्रजनन व बाल आरोग्य केंद्रे सात, बाह्यरुग्ण सेवेसाठी एकूण आठ दवाखाने, चार फिरते दवाखाने असणार आहेत. बाह्य व आंतररुग्ण सेवा प्रतिबंधात्मक सेवेअंतर्गत सहा रुग्णालये आणि पाच प्रसूतिगृहे अशी व्यवस्था करण्यात येणार आहे. विशेष म्हणजे, वैद्यकीय सेवा पुरेशा प्रमाणात देण्यासाठी प्राथमिक आरोग्य केंद्रे, ग्रामीण रुग्णालये, खासगी वैद्यकीय क्षेत्रातील कार्यरत संस्था यांच्याकडून प्रतिनियुक्तीवर कर्मचारी घेण्यात येणार आहेत.