भाज्यांचे दर स्थिर झाल्याने दिलासा नाशिक : डिसेंबरच्या प्रारंभी घसरलेले जिल्ह्यातील पालेभाज्यांचे दर काहीसे स्थिरावले आहेत. त्यामुळे शेतकऱ्यांना काही प्रमाणात परतावा मिळू लागला आहे. बाजारात आवक होणाऱ्या पालेभाज्यांचा आधीच्या तुलनेत उठाव होऊ लागल्याने शेतकऱ्यांना काहीसा दिलासा मिळाला आहे. फळभाज्यांनादेखील चांगल्या प्रमाणात भाव मिळू लागला आहे.
सीबीएस परिसराला
पार्किंगचा वेढा
नाशिक : नवीन सीबीएस परिसरात कुटुंबीयांना सोेडायला येणारे नागरिक तसेच त्या भागातील दुकानांमध्ये येणाऱ्या ग्राहकांकडून त्यांची वाहने रस्त्याच्या दुतर्फा पार्क केली जात असल्यामुळे नवीन सीबीएससमोरील तसेच सिव्हिलच्या वॉलकम्पाउंडकडील दोन्ही बाजू या वाहनांनी व्यापून जातात. त्यामुळे त्या रस्त्यावरून दुचाकी, चारचाकी वाहनांना अनंत अडचणींचा सामना करावा लागत आहे.
-------------
पदपथ विक्रेत्यांनी
व्यापले रस्ते
नाशिक : महानगरातील मुख्य बाजारपेठेतील बहुतांश रस्ते हे पदपथ विक्रेत्यांनी व्यापले असल्याने नागरिकांना बाजारपेठेतून चालण्यासाठी मुख्य रस्त्याचाच वापर करावा लागतो. त्यामुळे रस्त्यावरील वाहनांच्या गर्दीत पादचाऱ्यांची अधिक भर पडून संपूर्ण रस्ताच ठप्प होण्याचे प्रकार शनिवार, रविवारसारख्या सुट्टीच्या दिवशी घडत आहेत.
-------------
वाहत्या रस्त्यांवर
पार्किंग ठरते अडथळा
नाशिक : शिंगाडा तलाव परिसरातील विविध कार ॲक्सेसरीज दालनांसमोर मोठ्या प्रमाणात कारचे पार्किंग केले जात असल्याने त्या रस्त्यावरून अन्य वाहनांना वाहतुकीस अडथळा ठरत आहे. प्रारंभी केवळ दुकानांजवळील रस्त्यावर असलेले पार्किंग आता थेट मुख्य रस्त्याचा पावपेक्षा अधिक भाग व्यापू लागल्याने वाहतुकीत अनेकदा अडथळे निर्माण होत आहेत.
-----
वाहतूक बेटांवरील
गवत पुन्हा वाढले
नाशिक : शहरातील वाहतूक बेटांवरील गवत पावसाळ्यानंतर कापण्यात आले हाेते; मात्र गत दोन महिन्यात पुन्हा अनेक वाहतूक बेटांवरील गवत पुन्हा वाढल्यामुळे दुचाकी, चारचाकी वाहनचालकांना ते त्रासदायक ठरू लागले आहे, तसेच दुभाजकांमधील वाढलेले गवतदेखील रस्ता क्रॉस करताना वाहनचालकांच्या दृष्टीस अडथळा ठरू लागले आहे.