नाशिक :इस्लाम धर्माचे ज्येष्ठ वली सुफी संत हजरत शेख अब्दुल कादिर जिलानी उर्फ गौस-ए-आझम यांच्या स्मृतिदिनानिमित्त जुने नाशिक, वडाळागाव परिसरातून बुधवारी (दि.१९) ‘जुलूस-ए-गौसिया’ची मिरवणूक काढण्यात आली. मिरवणूकीत मोठ्या संख्येने मुस्लीम बांधव सहभागी झाले होते.
गौस-ए-आझम हे इस्लामी संस्कृतीमधील महान सुफी वली असून त्यांना अनन्यसाधारण महत्त्व आहे. सालाबादप्रमाणे यावर्षीही त्यांचा स्मृतिदिनानिमित्त शहरात विविध धार्मिक कार्यक्रम पार पडले. हा संपूर्ण महिना त्यांच्या स्मृतिप्रित्यर्थ साजरा केला जातो. विविध ठिकाणी महाप्रसादाचे वाटप महिनाभर केले जाते. दरम्यान, शहर-ए-खतीब हिसामुद्दीन अशरफी यांच्या नेतृत्वाखाली मिरवणूक काढण्यात आली. बुधवारी दुपारी पावणेचार वाजेच्या सुमारास चौक मंडई येथील जहांगीर मशिदीपासून मिरवणूकीला प्रारंभ करण्यात आला. प्रारंभी खतीब यांनी प्रार्थना करत संपुर्ण मानवजातीच्या कल्याणासाठी दुवा मागितली. यावेळी मौलाना महेबुब आलम, मौलाना रहेमतउल्ला मिस्बाही, मौलाना वासिक रजा, मौलाना शमशोद्दीन मिस्बाही, हाजी सय्यद मीर मुख्तार अशरफी, एजाज काझी, एजाज रजा मकरानी यांच्यासह समाजबांधव मोठ्या संख्येने उपस्थित होते. वरिष्ठ पोलीस निरिक्षक मंगलसिंह सुर्यवंशी यांनी उपस्थित धर्मगुरूंचे स्वागत केले. मिरवणूक बागवानपूरा, कथडा, शिवाजी चौक, चव्हाटा, नाईकवाडीपुरा, काजीपुरा, कोकणीपुरा, खडकाळी, शहीद अब्दुल हमीद चौक, पिंजारघाटमार्गे संध्याकाळी पाच वाजेच्या सुमारास बडी दर्गाच्या प्रारंगणात पोहचली.मिरवणूकीमध्ये दारुल उलूम सादिकुलउलूम, मदरसा गौस-ए-आझमचे विद्यार्थी पारंपरिक पोशाखात सहभागी झाले होते. मिरवणूक मार्गावर हिरवे ध्वज, पताका लावून सजावट करण्यात आली होती. तसेच ठिकाठिकाणी स्वागत कमानी उभारण्यात आल्या होत्या. खडकाळी परिसरातील सजावट लक्षवेधी ठरली. सहभागी समाजबांधव धार्मिक काव्य पठण करत मिरवणूकीत संचलन करत होते. दरम्यान, मीर मुख्तार हे अग्रभागी राहून गौस-ए-आझम यांच्या जीवनकार्याविषयी माहिती ध्वनिक्षेपकावरुन देत होते. बडी दर्गाच्या आवारात दरुदोसलाम व फातेहा पठण करुन संध्याकाळी सहा वाजता मिरवणूकीची सांगता करण्यात आली.सामुहिक अन्नदानचौक मंडई, बडी दर्गा येथे परिसरातील युवक मित्र मंडळांनी एकत्र येत महाप्रसादाचे आयोजन केले होते. सकाळी शेकडो किलोचे शाकाहारी अन्नदान चौकमंडईत तर संध्याकाळी बडी दर्गाच्या प्रारंगणात करण्यात आले. भाविकांनी मोठ्या संख्येने दोन्ही ठिकाणी अन्नदानाचा लाभ घेतला.