नाशिक : जिल्हा परिषदेच्या माध्यमिक विभागाच्या शिक्षणाधिकारी डॉ. वैशाली वीर-झनकर (४५) यांना ठाणे लाचलुचपत प्रतिबंधक विभागाने सापळ्यात पकडले; मात्र सूर्यास्तानंतर महिलेला कायद्याने अटक करता येत नसल्याने नातेवाइकांना समन्स देत सकाळी ताब्यात देण्याच्या हमीवर मध्यरात्री पथकाने त्यांची मुक्तता केली अन् हेच पथकाला भोवले. सकाळी त्या पुन्हा पथकाच्या ताब्यात आल्या नसल्याने त्यांना न्यायालयात फरार दाखविले गेले. पथकाने घरझडती घेतली असता त्यांच्या नावावर सुमारे तीन एकर जमीन आणि चार फ्लॅट अशी स्थावर मालमत्ता आढळून आली आहे.
ठाणे लाचलुचपत प्रतिबंधक विभागाच्या पथकाने मंगळवारी संध्याकाळी लाचखोरीच्या प्रकरणात चौकशीसाठी झनकर यांना ताब्यात घेतले होते. मध्यरात्रीपर्यंत चाललेल्या चौकशीनंतर त्यांना नातेवाइकांच्या हमीवर पथकाने सोडले आणि सकाळी पुन्हा हजर होण्याचे निर्देश दिले; मात्र त्यांनी सकाळी पथकाला गुंगारा देत शहरातून काढता पाय घेतला. पथकाने शासकीय मोटारचालक ज्ञानेश्वर सूर्यभान येवले (४९), प्राथमिक शाळेतील शिक्षक पंकज रमेश दशपुते (३८) यांच्याही घराची झडती घेतली.
झनकर यांच्या नावे शहरातील शिवाजीनगर भागात, गंगापूररोड, मुरबाड, गंधारे कल्याण असे प्रत्येकी एक याप्रमाणे चार फ्लॅट तसेच सिन्नरमध्ये ०.५७ गुंठे, कल्याण-मिलिंदनगरमध्ये ३१.७० गुंठे, १०.८ गुंठे,४०.८० गुंठे, १३.१०गुंठे तर सिन्नर येथे ०.५६ गुंठे, ३.४१ गुंठे, २२.७० गुंठे, अशी एकूण सुमारे १२३.६४ गुंठे अर्थात सुमारे ३ एकर अशी स्थावर मालमत्ता आढळून आली आहे. तसेच ४० हजारांची रोख रक्कम, एक होंडा सिटी कार, एक ॲक्टिवा दुचाकी अशी वाहने सापडली. एसबीआय, बँक ऑफ बडोदा, सिटी युनीयन बँक, पंजाब नॅशनल बँकेसह आदी बँकांचे पासबुक पथकाने ताब्यात घेतले आहे.
---इन्फो--
शिक्षक, चालकाच्याही घरांची झाडाझडती
मोटारचालक येवलेचे तीन बँकांमध्ये तर त्याच्या पत्नीच्या नावे दोन बँकेत आणि मुलगी, मुलाच्या नावे प्रत्येकी एका बँकेत खाते असल्याचे पथकाने घेतलेल्या घरझडतीत आढळले आहे. तसेच दोन वाहनांचे आरसीबुकही मिळाले आहे. पॉलिसीचीही छाननी केली जात आहेे. शिक्षक दशपुते यांच्या नावावर एक २ बीएचके राहता फ्लॅट, दोन दुचाकी, एसबीआय बँकेत दोन खाती आणि महाराष्ट्र बँकेत १ खाते असल्याचे निष्पन्न झाले आहे.
--इन्फो--
भद्रकाली पाेलीस ठाण्यात गुन्हा
ठाणे लाचलुचपत प्रतिबंधक विभागाच्या सापळा पथकाने भद्रकाली पोलीस ठाण्यात संशयित लाचखोर शिक्षणाधिकारी वैशाली झनकर, प्राथमिक शाळेचे शिक्षक संशयित पंकज देशमुख, शासकीय मोटारचालक ज्ञानेश्वर येवले अशा तिघांविरुध्द भ्रष्टाचार प्रतिबंध अधिनियमाच्या कलम ७, १२ नुसार गुन्हा दाखल केला आहे. दरम्यान, शिक्षक, चालकाला शुक्रवारपर्यंत (दि. १३) पोलीस कोठडी न्यायालयाने दिली आहे. तसेच वैशाली वीर-झनकर या फरार झाल्याचे पथकाने न्यायालयात सांगितले. त्यांचा पोलीस शोध घेत आहेत.