अकरावी प्रवेशासाठी हजारो अर्ज

गुणवत्ता यादीकडे लक्ष : आॅनलाइन प्रक्रियेला विद्यार्थ्यांचा प्रतिसाद

नाशिक : अकरावी प्रवेशासाठी बुधवारपासून सुरू झालेली अर्जप्रक्रिया शनिवारी संध्याकाळी ५ वाजता समाप्त झाली. मात्र ग्रामीण भागातील काही महाविद्यालयांतील मदत केंद्रांवर शनिवारी वीजकपातीमुळे प्रवेशप्रकियेत अडसर निर्माण झाला. त्यामुळे विद्यार्थ्यांची वाढलेली गर्दी लक्षात घेऊन प्रवेश अर्ज करण्यासाठी एक तास मुदत वाढवून देण्याचा निर्णय संबंधित संस्थांतर्फे घेण्यात आल्याने विद्यार्थ्यांना दिलासा मिळाला. अकरावी प्रवेश प्रक्रियेचा शेवटचा दिवस असल्याने विविध महाविद्यालयांमध्ये विद्यार्थ्यांनी सकाळपासूनच प्रवेश अर्ज करण्यासाठी गर्दी केली. बहुतेक महाविद्यालयांमध्ये आॅनलाइन अर्ज दाखल करण्याची सुविधा उपलब्ध करून देण्यात आली असल्याने आॅनलाइन प्रक्रियेला विद्यार्थ्यांचा चांगला प्रतिसाद लाभल्याचे दिसले.