----
मालेगावतून दुचाकी चोरी
मालेगाव : शहरातील भामेश्वर कॉम्प्लेक्स समोरून ३५ हजार रुपये किमतीची होण्डा दुचाकी (एमएच १५ जीटी ९१०९) अज्ञात चोरट्याने चोरून नेली. नितीन दगडू गवळी या शिक्षकाने कॅम्प पोलिसांत फिर्याद दिली. पोलिसांनी अज्ञात चोरट्याविरोधात गुन्हा दाखल केला. अधिक तपास उपनिरीक्षक पाटील करीत आहेत.
----
सोयगावी हाणामारी; दंगलीचा गुन्हा
मालेगाव : शहरातील सोयगाव येथील गिरणा स्टीलजवळ आयोध्यानगर भागात आगेवेताळ मंदिराच्या प्रवेशद्वाराजवळ हाणामारी झाली असून, याप्रकरणी छावणी पोलिसात दंगलीचा गुन्हा दाखल करण्यात आला. जीवन बाबू नागरे (रा. बॅंक कॉलनी) यांनी फिर्याद दिली. पोलिसांनी किशोर पाटील (पूर्ण नाव माहीत नाही व इतर ५ जण, रा. आयोध्यानगर) यांच्याविरोधात गुन्हा दाखल केला. मंदिराचे काम सुरू असताना आरोपींनी आरडाओरड केली म्हणून फिर्यादीने तू इथून निघून जा, असे सांगितल्याच्या कारणावरून वाद झाला. आरोपीने फिर्यादीला मंदिर तुमचे आहे का, आम्ही काहीही करू, असे सांगून हुज्जत घातली. आरोपी क्रमांक २ ते ७ यांनी फिर्यादीस मारहाण केली व जिवे ठार मारण्याचा दम दिला म्हणून गुन्हा दाखल करण्यात आला. अधिक तपास पोलीस नाईक जगताप करीत आहेत.
----
मालेगावी करीम नगरात हाणामारी
मालेगाव : मागील भांडणाची कुरापत काढून करीमनगर भागात चहाच्या हॉटेलवर हाणामारी झाली असून, कटरने वार करून एकास जखमी केल्याप्रकरणी आझादनगर पोलिसांत अब्दुल रशीद, जहीर अहमद व जहीर अहमदसोबत असलेला अनोळखी मुलगा यांच्याविरोधात गुन्हा दाखल करण्यात आला. नवीद अख्तर गुलाम इद्रीस यांनी फिर्याद दिली. अधिक तपास पोलीस नाईक सय्यद करीत आहेत.
----
मालेगावी गांधी कपडा मार्केटमध्ये हाणामारी
मालेगाव : शहरातील गांधी कपडा मार्केटजवळ गांधी चौकात मागील भांडणाची कुरापत काढून शिवीगाळ, मारहाण केल्याप्रकरणी अज्जू पहिलवान यांचा मुलगा इज्जु, मज्जु दुधवाला यांचा मुलगा सिज्जु, छोटा पहिलवान (पूर्ण नाव माहीत नाही) यांच्याविरोधात आझादनगर पोलिसांत गुन्हा दाखल करण्यात आला. शेख जमील अब्दुल अजीज (रा. शब्बीरनगर) या रिक्षाचालकाने फिर्याद दिली. फिर्यादीचा भाऊ अकील याच्याशी झालेल्या मागील भांडणाच्या रागातून आरोपींनी फिर्यादीस शिवीगाळ व मारहाण केली. लोखंडी पाइप डोक्यात मारून जखमी केले. अधिक तपास हवालदार मोरे करीत आहेत.
--------
दुचाकीच्या धडकेने दोघे जखमी
मालेगाव : मनमाड रस्त्यावर वऱ्हाणे शिवारात टेम्पोने दुचाकीला धडक दिल्याने झालेल्या अपघातात दोन जण जखमी झाले असून याप्रकरणी तालुका पोलिसांत टेम्पो (एमएच ०४ एफपी १६८९) वरील चालकाविरोधात गुन्हा दाखल करण्यात आला. दीपाली राजाराम खरात (रा. डिसोजा मैदान, मनमाड) यांनी फिर्याद दिली. फिर्यादी व जखमी राहुल अशोक पांडे हिरो होंडा दुचाकी (एमएच ४१ एवाय ८७११) वर मनमाडकडून मालेगावकडे येत होते. मालेगावकडून मनमाडकडे जाणाऱ्या टेम्पोने धडक दिल्याने दोघे जखमी झाले.