लुटीच्या निषेधार्थ रास्ता रोको आंदोलन

लुटीच्या निषेधार्थ रास्ता रोको आंदोलन

पंचवटी : पंचवटी पोलीस मुर्दाबाद, गुन्हेगारीला आळा बसलाच पाहिजे, पंचवटी पोलीस हाय हाय, अशा घोषणा देत व्यापाऱ्याच्या झालेल्या लुटीच्या निषेधार्थ संतप्त व्यापारी, शेतकरी व आडत्यांनी दुपारी १ वाजता दिंडोरीरोडवरील कृषी उत्पन्न बाजार समितीसमोरील रस्त्यावर उतरून रास्ता रोको आंदोलन करून घटनेचा तीव्र निषेध केला. शनिवारी रात्री साडेदहा वाजता विनोद अग्रहरी या व्यापाऱ्यावर हल्ला चढवून लाखो रुपयांची रोकड चोरून नेल्याची घटना घडली होती. या घटनेची माहिती सकाळी बाजार समितीतील व्यापारी, शेतकरी व आडत्यांना मिळताच त्यांनी बाजार समितीतील सर्व लिलाव बंद ठेवून रस्त्यावर धाव घेतली व अचानक रास्ता रोको केला. शेकडोंच्या संख्येने आंदोलनकर्ते रस्त्यावर आल्याने पोलिसांची चांगलीच धावपळ झाली. आंदोलनकर्त्यांनी थेट रस्त्यावर बसून घेत ‘पंचवटी पोलीस मुर्दाबाद’, अशा घोषणा सुरू केल्या. बाजार समितीबाहेर रास्ता रोको आंदोलन सुरू असल्याचे कळताच पोलिसांनी त्याठिकाणी धाव घेऊन आंदोलनकर्त्यांची समजून काढण्याचा प्रयत्न केला. मात्र, आंदोलनकर्त्यांचा आंदोलनात्मक पावित्रा बघून पोलिसांनाही त्यांच्यापुढे नमते घ्यावे लागले. व्यापाऱ्याच्या लुटीच्या रात्री घडलेल्या घटनेत लाखो रुपयांची रोकड गेलेली असतानाही केवळ दोन लाख रुपयांचीच नोंद केली. तसेच वारंवार घटना घडल्यानंतरही पोलिसांकडून कोणतीही उपाय योजना केली जात नाही. बाजार समितीत केवळ दोनच कर्मचारी असतात तेदेखील जागेवर राहत नाही.