नाशिक : राज्य नाट्य स्पर्धा आयोजनाची तारीख लांबणीवर टाकण्याच्या निर्णयात बदल करीत सांस्कृतिक संचलनालयाने राज्य नाट्यच्या सर्व स्पर्धा १५ जानेवारी या निर्धारित तारखांनाच घेण्यात येणार असल्याचे कळविण्यात आले आहे.
सांस्कृतिक कार्य संचालनालयामार्फत दरवर्षी राज्य नाट्य स्पर्धांचे आयोजन करण्यात येते. यावर्षी स्पर्धा आयोजनाची प्रक्रिया सुरू करून १५ डिसेंबरपर्यंत अर्जदेखील स्वीकारण्यात आले. त्यानंतर गुरुवारी रात्री काही शासकीय प्रसारमाध्यमांद्वारे राज्य नाट्य स्पर्धा पुढे ढकलल्या जात असल्याच्या आशयाचे मजकूर प्रसारित होणे सुरू होते. त्यामुळे त्याबाबत सांस्कृतिक संचलनालयाकडे विचारणादेखील करण्यात आली. मात्र, त्यात तथ्य नसून १५ जानेवारीपासून स्पर्धेस सुरुवात होणार असल्याचे सांस्कृतिक संचलनालयाच्या वतीने कळविण्यात आले आहे. राज्य नाट्य स्पर्धा ठरलेल्या वेळापत्रकाप्रमाणेच कोविडविषयक सर्व नियमावलीचे पालन करून व खबरदारी घेऊन रंगकर्मींनी प्रयोगांचे सादरीकरण करण्याचे निर्देश देण्यात आले आहेत. समाज माध्यमावरील प्रसारित झालेल्या मजकुराच्या अनुषंगाने हे निवेदन सांस्कृतिक कार्य विभागामार्फत देण्यात आले आहे.