कलशारोहण : पांडुरंगाच्या मूर्तीची शोभायात्रा
सिन्नर : शहराच्या विजयनगर येथे पुण्यश्लोक अहिल्याबाई होळकर वारकरी भवन येथील मंदिरातील श्री विठ्ठलमूर्ती प्राणप्रतिष्ठा सोहळा उत्साहात पार पडला. बुधवारी सकाळी ९ वाजता हभप रामराव महाराज ढोक यांच्या हस्ते, तर कलशारोहण न्यायवेदांताचार्य श्री स्वामी देवानंद गिरीजी महाराज, महामंडलेश्वर सोमेश्वरानंद महाराज यांच्या हस्ते पार पडला. यानिमित्त सोमवारपासून तीन दिवस विविध धार्मिक कार्यक्रम पार पडले. विठ्ठल मंदिराचा कलशारोहण व मूर्ती प्राणप्रतिष्ठा सोहळ्यानिमित्त कीर्तन सोहळा व महाप्रसाद आयोजित करण्यात आला होता. सोमवारी अभिषेक महापूजा करण्यात आली. मंगळवारी सकाळी अभिषेक महापूजा, तसेच ९ वाजता भगवान पांडुरंगाच्या मूर्तीची मिरवणूक व शोभायात्रा काढण्यात आली. बुुधवारी सकाळी ९ वाजता मूर्ती प्राणप्रतिष्ठा सोहळा, सकाळी १० वाजता रामराव महाराज ढोक यांच्या रसाळ सुमधुर वाणीतून कीर्तन सोहळा व त्यानंतर महाप्रसादाचे आयोजन करण्यात आले होते. कार्यक्रम यशस्वीतेसाठी विठ्ठल मंदिर सेवा समिती, अखिल भारतीय वारकरी मंडळाचे अध्यक्ष कैलास महाराज तांबे व वारकरी यांनी परिश्रम घेतले.
-----------------
पावणेदोन एकर जागेवर वारकरी भवन
भजन, कीर्तन आणि आध्यात्मिक व्यासंग करू इच्छिणाऱ्यांसाठी सिन्नरमध्ये पावणेदोन एकर जागेवर सुमारे एक कोटी एक लाख रुपये खर्चून प्रशस्त वारकरी भवन उभारण्यात आले आहे. माजी आमदार राजाभाऊ वाजे यांच्या पुढाकाराने सिन्नर नगर परिषदेचे योगदान, तसेच माजी आमदार रामहरी रूपनवर व विधान परिषदेच्या उपसभापती नीलम गोऱ्हे यांच्या आमदार निधीतून प्रत्येकी दहा लाख रुपये मदतीतून वारकरी भवन साकारले आहे. पुण्यश्लोक अहिल्यादेवी होळकर यांचे नाव देण्यात आले असून त्यांचा अर्धाकृती पुतळाही सभागृहात उभारला आहे.
------------------
पंढरपूरच्या मूर्तीशी साम्य
११६ फूट लांब व ४० फूट रुंद आकाराच्या सभागृहात अडीच हजार श्रोत्यांच्या बैठकीची क्षमता आहे. पश्चिम बाजूस ३९ बाय २९ फूट आकाराचे मंदिर उभारण्यात आले आहे. १० बाय १० आकाराच्या गाभाऱ्यातील ४७ इंच उंचीची पंढरपूर येथील विठ्ठलमूर्तीशी साम्य असलेली एकशे एक किलो वजनाची गन मेटलमधील विठ्ठलमूर्ती साकारली आहे.
--------------------
सिन्नर येथे विठ्ठलमूर्ती प्राणप्रतिष्ठा कार्यक्रमाप्रसंगी हभप रामराव महाराज ढोक, माजी आमदार राजाभाऊ वाजे, श्री स्वामी देवानंद गिरीजी महाराज, महामंडलेश्वर सोमेश्वरानंद महाराज, हभप कैलास महाराज तांबे यांच्यासह भाविक.
(०१ सिन्नर १)
010921\01nsk_14_01092021_13.jpg
०१ सिन्नर १