विहिरींनी तळ गाठल्याने टंचाई

येवला : वाढत्या उन्हाच्या चटक्याबरोबरच तालुक्यातील उत्तर-पूर्व भागाला पाणीटंचाईची झळ बसू लागली आहे. साठवण बंधारे आणि विहिरींनी तळ गाठण्यास सुरुवात केल्याने माणसांच्या पिण्याच्या पाण्याचा प्रश्न गंभीर बनत असतानाच पशुधनाच्या चारा-पाण्याचा प्रश्नही ऐरणीवर आला आहे.डोंगराळ व कायमच दुष्काळी भाग म्हणून उत्तर-पूर्व भागाची ओळख आहे. दरवर्षी एप्रिल ते जून या तीन महिन्यांमध्ये परिसरातील महिला व तरुणांना पिण्याच्या पाण्यासाठी भटकंती करावी लागते. माणसांच्या पिण्याच्या पाण्याचा प्रश्न गंभीर बनत असल्याने पशुधनाची पाण्यासाठी मोठी वणवण होते. ममदापूर येथील गावालगत असलेला गावठाण बंधारा व विहिरींनी तळ गाठला असून, पिण्याच्या पाण्यासाठी ममदापूरवासीयांना भटकंती करावी लागणार असल्याचे चित्र आहे. बहुतांशी शेतकरी, सामान्य माणसेही चारा पाण्यासाठी बाहेरगावी जाणे पसंत करतात. परंतु यंदा करोनाच्या पार्श्वभूमीवर लॉकडाउन व संचारबंदी असल्याने बाहेरगावी जाणे शक्य नसल्याने पशुधन सांभाळण्याचा गंभीर प्रश्न निर्माण झाला आहे. परिसरातील प्रलंबित सिंचनाचे प्रकल्प तातडीने शासनाने मार्गी लावावे, अशी मागणी सामाजिक कार्यकर्ते प्रकाश जानराव यांनी केली आहे.