सादरे आत्महत्त्या प्रकरण : साडेसहा तास चौकशी

रवींद्र चोैधरीची सीआयडी चौकशी

नाशिक : जळगावमधील रामानंद पोलीस ठाण्याचे निलंबित पोलीस निरीक्षक अशोक सादरे यांच्या आत्महत्त्या प्रकरणाची चौकशी करणाऱ्या सीआयडीच्या अधिकाऱ्यांनी सोमवारी (दि़१६) संशयित सागर चौधरीचे वाळू व्यवसायातील भागीदार रवींद्र चौधरी यांची सुमारे साडेसहा तास चौकशी केली़ यामध्ये आणखी एक वाळू व्यावसायिक राजेश मिश्रा यांची मंगळवारी (दि़१७), तर मनसे नगरसेवक ललित कोल्हे यांची बुधवारी (दि़१८) चौकशी केली जाणार आहे़ रामानंदनगर परिसरातील रस्ते अवजड वाहतुकीसाठी बंद असूनही सर्रास वाहतूक केली जात असल्याने आंदोलन करणार असल्याची माहिती नागरिकांनी ३ मे २०१५ रोजी पोलीस निरीक्षक अशोक सादरे यांना फोनद्वारे दिली़ त्यानुसार गुन्हे शोध पथकाचे प्रमुख पोलीस हेड कॉन्स्टेबल राजेंद्र उगले हे कर्मचाऱ्यांसह घटनास्थळी पोहोचले व त्यांनी काही मुरूम व रेतीची वाहतूक करणारी वाहने पकडली़ या वाहनांना सोडून द्या, असे सांगण्यासाठी गेलो असता सादरे यांनी रिव्हॉल्व्हरचा धाक दाखवून खंडणीची मागणी केल्याची तक्रार सागर व रवींद्र चौधरी यांनी वरिष्ठांकडे केली होती़या तक्रार अर्जाबाबत ७ मे २०१५ रोजी पोलीस निरीक्षक अशोक सादरे यांनी लेखी जबाबात वरिष्ठांकडे आपली बाजू मांडली होती़ यानंतर सागर चौधरी, राजेश मिश्रा व रवींद्र चौधरी यांनी न्यायालयात खासगी फौजदारी दावा दाखल केला होता़ त्यावर न्यायालयाने दिलेल्या आदेशानुसार सादरेंवर खंडणीचा गुन्हाही दाखल झाला़ या आत्महत्त्या प्रकरणाचा तपास करणारे सहायक पोलीस आयुक्त विजयकुमार चव्हाण यांनीही या तिघांच्या चौकशीसाठी समन्स काढले होते़राज्य गुन्हे अन्वेषण विभागाने सुरू केलेल्या चौकशीतही वाळू व्यावसायिक रवींद्र चौधरी, राजेश मिश्रा व मनसे नगरसेवक ललित कोल्हे यांना समन्स काढून त्यांची चौकशी सुरू केली आहे़ त्यानुसार सोमवारी रवींद्र चौधरी यांची सकाळी अकरा ते सायंकाळी साडेपाच या कालावधीत सीआयडीचे पोलीस अधीक्षक प्रदीप देशपांडे व पोलीस निरीक्षक के. डी़ पाटील यांनी सखोल चौकशी केली़ या प्रकरणातील साडेतीन हजार कागदपत्रांचा सीआयडीने सूक्ष्म अभ्यास केला असून, येत्या चार - पाच दिवसांत सीआयडीचे पथक प्रत्यक्ष जळगावमध्ये जाऊन चौकशी करणार आहे़ (प्रतिनिधी)