तलावात मूर्ती विसर्जनास विरोध

तलावात मूर्ती विसर्जनास विरोध

सिडको : विल्होळी, तालुका नाशिक येथील लघु तलावात गणपती विसर्जन करण्यास ग्रामस्थांनी विरोध दर्शविला आहे. याबाबत जिल्हाधिकाऱ्यांना निवेदन देण्यात आले.विल्होळी ग्रामपंचायत हद्दीत गावालगत ३० दसलक्षघनफूट क्षमतेचा तलाव असून, सदर तलावात सिडको, इंदिरानगर, गरवारे, पाथर्डी फाटा, अंबड यांसह परिसरातून गणेशोत्सव काळात गणपती विसर्जनासाठी भाविक येतात. तथापि सदर तलावातून मागील तीन वर्षांत मोठ्या प्रमाणात गाळ, मुरुम इत्यादींचे अनधिकृत खोदकाम केल्याने खड्डे झालेले आहेत. भाविकांना सदर खड्ड्यांचा अंदाज नसल्यामुळे दरवर्षी दोन-तीन भाविकांचा बुडून मृत्यू होत आहे. नुकताच विल्होळी येथील शुभम मोतीराम भावनाथ या १२ वर्षीय शालेय बालकाचा सदर खड्ड्यात पडून मृत्यू झाला आहे.गणपती विसर्जन काळात मोठ्या प्रमाणात भाविक गणपती विसर्जनासाठी गर्दी करीत असल्याने पोलीस व ग्रामरक्षक दलाच्या कार्यकर्त्यांना गर्दीवर नियंत्रण ठेवणे शक्य होत नाही. तसेच भाविक मोठ्या प्रमाणात निर्माल्य तलावात टाकत असल्याने जलप्रदूषण होत आहे. या सर्व बाबींचा विचार करता गेल्या १५ आॅगस्टच्या ग्रामसभेवर सदर तलावात गणेश विसर्जन करू न देण्याबाबत ठराव पारित करण्यात आलेला आहे. दरम्यान, याबाबत विल्होळी ग्रामपंचायतीच्या वतीने जिल्हाधिकारी तसेच विल्होळी तालुका पोलीस ठाणे आदिंना निवेदन देण्यात आले आहे. यावेळी सरपंच चंद्रभागा डांगे, उपसरपंच नामदेव भावनाथ, बाजीराव गायकवाड, भास्कर थोरात, बबन गायकवाड आदि उपस्थित होते. (वार्ताहर)