स्थायी समितीवर मनसेचाच सभापती विराजमान होण्याची शक्यता

स्थायी समितीवर मनसेचाच सभापती विराजमान होण्याची शक्यता

नाशिक : पुणे महापालिकेच्या स्थायी समिती सभापतिपदाच्या निवडणुकीत मनसेने राष्ट्रवादी कॉँग्रेसला उघडपणे साथ दिल्याने नाशिकमध्ये स्थायी समितीवर पुन्हा एकदा मनसेचाच सभापती विराजमान होण्याची दाट शक्यता निर्माण झाली आहे. पुण्याच्या मोबदल्यात नाशिक मनसेच्या ताब्यात देण्याचा निर्णय झाला असल्यास मनसेच्या या बेगमीमुळे सभापतिपदाच्या शर्यतीतून राष्ट्रवादी ‘उणे’ होण्याची चिन्हे दिसू लागली असून, स्थायी समिती सभापतिपदाच्या निवडणुकीत राष्ट्रवादी आणि अपक्षांच्या मदतीने मनसेचा सभापती विराजमान होणे जवळपास निश्चित मानले जात आहे. नाशिकच्या स्थायी समिती सभापतिपदाच्या निवडणुकीसाठी हालचाली गतिमान झाल्या असताना आणि राष्ट्रवादीचे इच्छुक उमेदवार शिवाजी चुंबळे यांनी आपली संपूर्ण ताकद पणाला लावत सभापतिपदासाठी दावा ठोकला असताना गुरुवारी झालेल्या पुणे महापालिकेच्या स्थायी समिती सभापतिपदाच्या झालेल्या निवडणुकीने समीकरणे बदलून टाकली आहेत. पुण्यात यापूर्वी राष्ट्रवादीची सेना-भाजपाबरोबर युती होती; परंतु स्थायी समिती सभापतिपदाच्या निवडणुकीत आश्चर्यकारकपणे सूत्रे फिरली आणि मनसेच्या साथीने राष्ट्रवादीच्या अश्विनी कदम या सभापतिपदी आरूढ झाल्या. पुण्यात सभापतिपदाच्या निवडणुकीत राष्ट्रवादी, कॉँग्रेस आणि मनसे अशी युती झाल्याने त्याचे पडसाद नाशिक महापालिकेच्या स्थायी समिती सभापतिपदाच्या निवडणुकीत उमटणार आहेत. महापौरपदाच्या निवडणुकीत राष्ट्रवादीने ऐनवेळी मनसेला मदतीचा हात दिला होता. त्याच मदतीची आठवण करून देत आता स्थायी समिती सभापतिपदाच्या निवडणुकीत राष्ट्रवादीने दावा ठोकला आहे. मागील आठवड्यात राष्ट्रवादीचे इच्छुक उमेदवार शिवाजी चुंबळे आणि पक्षाच्या गटनेत्या कविता कर्डक यांनी ‘रामायण’ बंगल्यावर जाऊन महापौरांसह मनसेच्या शहराध्यक्षांशी गुफ्तगुही केले होते. परंतु रविवार दि. १ मार्चला नाशिक दौऱ्यावर आलेले मनसे प्रमुख राज ठाकरे यांनी कोणत्याही परिस्थितीत सभापतिपद मनसेकडेच कायम राखण्याचे आदेश पदाधिकाऱ्यांना दिले होते. (प्रतिनिधी)