नाशिक : ओळखीच्या युवतीशी बोलतो तसेच दमदाटी, मारहाण व शिवीगाळ करतो याचा राग मनात धरून चौघा संशयितांनी नाशिक कृषी उत्पन्न बाजार समितीत काम करणाऱ्या दीपक अहिरे या हमालाची प्रेमप्रकरणातून शनिवारी (दि़४) रात्रीच्या सुमारास धारदार शस्त्राने वार करून खून केल्याची घटना घडली़ या प्रकरणी पोलिसांनी अटक केलेल्या चौघांपैकी दोघांना न्यायालयाने १० मार्चपर्यंत पोलीस कोठडी, तर दोघा विधीसंघर्षित बालकांची बाल निरीक्षणगृहात रवानगी केली आहे़औरंगाबाद रोडवरील निलगिरीबाग येथील युवक दीपक दगडू अहिरे (३१) हा कृषी उत्पन्न बाजार समितीतील काम आटोपून दुचाकीने घरी जात असताना चार - पाच संशयितांनी बाजार समितीजवळील हॉटेल उत्तम हिरासमोर धारदार शस्त्राने वार करून त्याचा खून केला़ या प्रकरणी नवनाथनगर येथील मयूर किरण पगारे, दिगंबर किशोर वाघ या दोघांना मुंबईतून तर दोन विधीसंघर्षित बालकांना शहरातून अटक केली़ या चौघांनाही न्यायालयात हजर करण्यात आले होते़ दरम्यान, या खुनातील पाचव्या संशयितास नाशिकरोड रेल्वेस्थानक परिसरातून अटक करण्यात आली असून, तो विधीसंघर्षित असल्याची माहिती पंचवटी पोलिसांनी दिली आहे़ (वार्ताहर)