सिन्नरजवळ कंटेनर-बस अपघातात एक ठार

सिन्नर : सिन्नर-शिर्डी महामार्गावर मिरगाव फाट्यावर पहाटे ४.३० वाजण्याच्या सुमारास कंटेनर व एसटी बस यांच्यात समोरासमोर धडक होऊन झालेल्या अपघातात बसमधील एक प्रवाशी जागीच ठार झाला, तर अन्य प्रवाशी जखमी झाल्याची घटना घडली.  रत्नाकर माधवराव पाटील (५०) रा. पारोळे, जि. जळगाव असे मृताचे नाव आहे. शिर्डी येथून सिन्नरच्या दिशेने करमाळा डेपोची एसटी बस (क्र. एमएच-२०, बीएल-४२११) प्रवासी घेऊन येत असताना, पहाटे ४.३०च्या सुमारास मिरगाव फाट्यावर गुरुदत्त हॉटेलसमोर सिन्नरकडून भरधाव वेगात येणाऱ्या कंटनेरने बसला जोराची धडक दिली. या अपघातात बसमधील प्रवाशी रत्नाकर पाटील यांच्या डोक्याला गंभीर मार लागल्याने त्यांचा जागीच मृत्यू झाला, तर अन्य प्रवाशीही जखमी झाले. अपघातानंतर कंटनरचालक वाहनासह फरार झाला. या प्रकरणी बसचालक शिवाजी अशोक खरात (३३), रा. कोंडेज, ता. करमाळा, जि.सोलापूर यांनी दिलेल्या फिर्यादीवरून वावी पोलिसांनी अज्ञात कंटेनर चालकाविरोधात अपघाताचा गुन्हा दाखल केला असून, पुढील तपास हवालदार प्रकाश गवळी करत आहेत.