----
ट्रॅक्टर दुरुस्त करताना जखमी हाेऊन एकाचा मृत्यू
मालेगाव : तालुक्यातील निमगाव येथे ट्रॅक्टरचे चाक पंक्चर झाल्याने, पंक्चर काढत असताना, ट्रॅक्टरचे नटबोल्ट तुटून तोंडावर मार लागल्याने, जखमी झालेल्या बाळू सोमा माळी (३२) यांचा मृत्यू झाला. त्यांना सामान्य रुग्णालयातून अधिक उपचारार्थ नाशिक येथे हलविण्यात आले होते. तालुका पोलिसांनी आकस्मिक मृत्यूची नोंद केली. अधिक तपास पोलीस नाईक गायकवाड करीत आहेत.
----
ट्रकची दुचाकीला धडक; एक जखमी
मालेगाव : शहरातील मोसम पूल येथे कॅम्प रोडने येत असताना, दुचाकी क्रमांक एमएच ४१ एव्ही २१११ ला ट्रक क्रमांक एमएच १९ झेड ४०९४ ने धडक दिली. यात दुचाकीस्वार जखमी झाला. बाबुलाल पांडुरंग सूर्यवंशी रा.नवा होळी चौक, संगमेश्वर यांनी छावणी पोलिसात फिर्याद दिली. पोलिसांनी ट्रक चालकाच्या विरोधात गुन्हा दाखल केला. अधिक तपास पोलीस नाईक आहेर करीत आहेत.
----
वऱ्हाणे शिवारात अपघात; एक जखमी
मालेगाव : तालुक्यातील मनमाड रस्त्यावर वऱ्हाणे गावाजवळ भरधाव वेगात जाणाऱ्या ट्रेलर क्रमांक जीए ७२८७ ने आयशर क्रमांक एमएच १२ एलटी ८९६० ला धडक दिली. यात चालक पवनसिंग घनश्यामसिंग (३०) रा.राजस्थान याच्या दुखापती, तसेच दोन्ही वाहनांच्या नुकसानीस कारणीभूत होऊन अपघाताची खबर न देता पळून गेला, म्हणून ट्रेलर चालकाच्या विरोधात गुन्हा दाखल करण्यात आला. किशनकुमार नवलकिशोर योगी (३४) रा. महेनपूर, ता.बन्सुर, जि.अलवर (राजस्थान) यांनी तालुका पोलिसात फिर्याद दिली. अधिक तपास पोलीस नाईक गायकवाड करीत आहेत.
----
सोयगावात जबरी चोरी
मालेगाव : शहरातील सोयगाव येथील हनुमानवाडी श्रीकृष्ण कॉलनी भागात दुचाकीवर आलेल्या दोन अज्ञात चोरट्यांनी पंधरा हजार रुपये किमतीची सोन्याची चैन हिसकावून पळवून नेली. ओमप्रकाश सुधाकरराव सरोदे यांनी कॅम्प पोलिसात फिर्याद दिली. फिर्यादी सरोदे यांचे काका मधुकर लक्ष्मण सरोदे यांच्याजवळ दुचाकीवर आलेल्या दोघांनी पत्ता विचारण्याचा बहाणा करून, त्यांच्या गळ्यातील दीड तोळे वजनाची जुनी वापरती सोन्याची चैन चोरून नेली. अधिक तपास उपनिरीक्षक मोरे करीत आहेत.