नाशिक : शिवसेनेच्या नाशिक महानगरप्रमुखपदी सचिन मराठे व महेश बडवे या दोघांच्या पदग्रहण सोहळ्याला आजी, माजी जिल्हा प्रमुखांसह जुन्या शिवसैनिकांनी लावलेली हजेरी व दोघा महानगरप्रमुखांच्या स्वागतासाठी जमलेल्या हजारो सैनिकांमुळे शिवसेनेत जल्लोष निर्माण झाला असून, शिवसेनेच्या इतिहासात पहिल्यांदाच सेना भवनसमोर फटाक्याच्या आतषबाजीत व ढोल-ताशांच्या गजरात नवनियुक्तांचे स्वागत करण्यात आले आहे. एरव्ही शिवसेनेच्या स्थानिक पातळीवर खांदेपालट झाल्यानंतर पदावरून गच्छंती झालेल्या पदाधिकारी व त्यांच्या समर्थकांमध्ये निर्माण होणारी नाराजी व त्यातून गटबाजीमुळे नवनियुक्त पदाधिकाऱ्याला पदभार स्वीकारल्याच्या पहिल्या दिवसापासूनच गटबाजीचा सामना तसेच राजी-नाराजी घालविण्याचे प्रयत्न करावे लागत. शिवाय नवनियुक्त पदाधिकारी कोणाच्या गटाचा यावरच त्याला समर्थन वा सहकार्य करण्याची भूमिका ज्येष्ठ आजी, माजी पदाधिकाºयांकडून केली जात होती. परंतु आजवरच्या या सर्व गोष्टीला सोमवारी फाटा देण्यात आला. पक्षाने मूळ शिवसैनिक असलेल्या सचिन मराठे यांची महानगरप्रमुख म्हणून नियुक्ती केल्याने त्यांच्या स्वागतासाठी पहिल्यांदाच दत्ता गायकवाड, विनायक पांडे व जयंत दिंडे या तीन माजी जिल्हा प्रमुखांनी आवर्जून हजेरी लावली. त्याचबरोबर एकेकाळी सुनील बागुल यांचे खंदे समर्थक म्हणून ओळखल्या जाणाºया मंगला भास्कर, प्रेमलता जुन्नरे, कोकिळा वाघ या जुन्या महिला सैनिकांची उपस्थिती बरेच काही सांगून गेले. काळानुरूप स्थानिक सेनेत झालेल्या उलथापालथीमुळे पदाधिकाºयांपासून दुरावलेले परंतु मनाने सेनेतच असलेल्या जुन्या शिवसैनिकांनीदेखील या सोहळ्यास हजरी लावल्याने शिवसेनेचे कार्यालय बºयाच कालावधीनंतर गर्दीने खच्चून भरले होते. सर्व पदाधिकारी व नगरसेवकांनी नवीन महानगरप्रमुखांच्या पदग्रहणाला उपस्थित राहण्याची ही देखील पहिलीच वेळ असल्याचे जाणकारांचे म्हणणे आहे.
खांदेपालट होताच जुन्या सैनिकांनी चढली पायरी
By लोकमत न्यूज नेटवर्क | Updated: March 20, 2018 01:20 IST