नाशिक : मागील चार दिवसांपासून नाशिककरांना थंडीचा कडाका सहन करावा लागत असून, सलग दोन दिवसांपासून किमान तपमानाचा पारा ९.४ अंशावर स्थिरावला आहे. मंगळवारी (दि. २६) तपमान ९.४ अंश इतके नोंदविले गेले. राज्यात सर्वाधिक थंडीचा कडाका मागील दोन दिवसांपासून नाशिकमध्ये जाणवत होता. मंगळवारी गोंदियामध्ये नीचांकी ८.५ इतके किमान तपमान नोंदविले गेले, तर सर्वाधिक थंडी असलेले नाशिक हे राज्यातील दुसºया क्रमांकाचे शहर ठरले. एकूणच विदर्भातील गोंदियानंतर नाशकात कडाक्याची थंडी जाणवत आहे. नाशिक जिल्ह्यातील निफाड तालुका जास्त प्रमाणात गारठला आहे. सोमवारपासून शहराच्या किमान तपमानाचा पारा सातत्याने दहा अंशांच्या खाली राहत असून, शहरात थंडीचा कडाका वाढत असल्याने नाशिककर गारठले आहे. मागील दोन दिवसांपासून राज्यात सर्वाधिक नीचांकी तपमानाची नोंद नाशिकमध्ये होत होती. किमान तपमानाचा पारा ९ अंशांच्या जवळपास राहत असल्यामुळे नाशिककरांना थंडीची तीव्रता अधिकच जाणवत आहे. एकूणच उत्तर भारतात आलेल्या शीतलहरीमुळे नाशिकच्या वातावरणावरही त्याचा प्रभाव मोठ्या प्रमाणात जाणवू लागला आहे. वाढत्या थंडीच्या कडाक्यामुळे शहरात उबदार कपड्यांच्या वापरावर नागरिकांकडून भर दिला जात आहे. याबरोबरच शेक ोट्यांची संख्या अधिक वाढू लागली आहे. गोदाकाठासह शहराला लागून असलेल्या मळे परिसरात थंडीची तीव्रता जास्त जाणवत असल्याने संध्याकाळी ६ वाजेपासूनच या भागांमध्ये शेतकºयांकडून शेकोट्या पेटवून गप्पांचे फड रंगत आहे. थंड हवेचे ठिकाण म्हणनू प्रसिद्ध असलेल्या महाबळेश्वरमध्ये किमान तपमान १४ अंश इतके नोंदविले गेले आहे. यापेक्षा पाच अंशांनी कमी तपमान नाशिकमध्ये, तर गोंदियामध्ये सहा अंशांने कमी तपमान राहिले. एकूणच नाशिकसह गोंदिया जिल्ह्यात कडाक्याची थंडी पडली आहे. पुढील काही दिवस डिसेंबरअखेरपर्यंत नाशिकमध्ये किमान तपमान दहा अंशांपेक्षा कमी राहण्याचा अंदाज वर्तविण्यात आला आहे.
नाशिक @ ९.४
By लोकमत न्यूज नेटवर्क | Updated: December 27, 2017 00:30 IST