नाशिक : राज्य शासनाच्या महसूल व वन विभाग मंत्रालयाकडून उपजिल्हाधिकारी संवर्गातील अधिकाऱ्यांच्या विनंती बदल्या करण्यात आल्या आहेत. यामध्ये नाशिक जिल्हाधिकारी कार्यालयातील उपजिल्हा निवडणूक अधिकारी स्वाती थवील यांची पाटबंधारे क्रमांक-१च्या रिक्त पदावर नियुक्ती करण्यात आली. त्यांच्या बदलीने रिक्त झालेल्या पदावर संगमनेरचे उप विभागीय अधिकारी शशिकांत मंगरुळे यांनी नियुक्ती करण्यात आली आहे. २०१९साली मंगरुळे यांची नाशिकमधून बदली करण्यात आली होती.
महिनाभरापासून नाशिक विभागातील विनंती बदल्या रखडल्या होत्या. अखेर या बदल्यांचे आदेश शासनाने काढले आहेत.नाशिक, धुळे, अहमदनगर, नंदुरबार या जिल्ह्यांमधील उपजिल्हाधिकारी संवर्गातील आठ ते दहा अधिकाऱ्यांच्या विनंती बदल्या करण्यात आल्या आहेत. यामध्ये नंदुरबारचे जिल्हा पुनर्वसन अधिकारी नितीन सदगीर यांची मालेगाव येथे उपविभागीय अधिकारी पदावर नियुक्ती करण्यात आली आहे. तेथील विजयानंद शर्मा यांची बदली करण्यात आली आहे. भुसूधार विभाग, नाशिकचे सहायक आयुक्त कुंदनकुमार सोनावणे यांची सहायक अयुक्त (मावक) नाशिक येथे निलेश जाधव यांच्या बदलीने रिक्त झालेल्या पदावर नियुक्ती करण्यात आली आहे.
तसेच सहायक आयुक्त भूसूधार पदी प्रशासक, नवनगर राज्य रस्ते विकास महामंडळात मागील सात वर्षांपासून कार्यरत असलेले विठ्ठल सोनावणे यांची नियुक्ती करण्यात आली आहे. मंगरूळे यांनी यापुर्वी २०१९-२३पर्यंत संगमनेर उप विभागीय अधिकारी तर २०१३-२०१६ पर्यंत निफाडचे उपविभागीय अधिकारी आणि २०१६-२०१९पर्यंत उपजिल्हाधिकारी नाशिक म्हणून काम पाहिले आहे. सोनावणे यांच्या कार्यकाळात समृद्धी महामार्गाचे भुसंपादन प्रक्रिया पूर्ण करण्यात आली.