वणी : आद्य स्वयंभू शक्तिपीठ श्री सप्तशृंगीदेवीचे राज्याचे धर्मादाय आयुक्त शशिकांत बी. सावळे यांनी सपत्नीक दर्शन घेऊन पंचामृत महापूजा केली. त्यांच्या समवेत न्यासाचे विश्वस्त उन्मेष गायधनी, अॅड. सुहास पाठक, आप्पासाहेब जंजिरे व न्यासाचे व्यवस्थापक सुदर्शन दहातोंडे, कार्यकारी अधिकारी भगवान नेरकर आदि होते. यावेळी सप्तशृंगदेवी न्यास व सप्तशृंग निवासिनी देवी ट्रस्ट अंतर्गत धार्मिक पूजा अर्चा, मंदिर परिसरातील स्वच्छता, भाविकांच्या सेवा सुविधांची त्यांनी पहाणी करून माहिती घेतली तसेच स्वच्छता व निटनेटकेपणाबद्दल प्रशंसा केली. परिसराची व व्यवस्थेची माहिती घेताना काही मार्गदर्शक सूचनाही त्यांनी केल्या. यात्राकाळात ट्रस्ट विश्वस्त मंडळ व प्रशासन यांनी अधिक उत्कृष्ट पद्धतीने नियोजन करून भाविकांच्या सेवा-सुविधांसाठी विशेष लक्ष द्यावे, असे सावळे सांगितले. (वार्ताहर)
धर्मादाय आयुक्तांतर्फे सप्तशृंगगडावर महापूजा
By admin | Updated: January 29, 2017 01:09 IST