रस्त्यावर खड्ड्यांचे साम्राज्य

---------------------------------

तहसील आवारात पार्किंगची गैरसोय

मालेगाव:- तहसील कार्यालयाच्या आवारात पार्किंगची सोय नसल्याने नागरिकांचे हाल होत आहेत. कार्यालय आवारात सध्या ग्रामपंचायत निवडणूक साहित्य वाटपासाठी मंडप उभारण्यात आला आहे. त्यामुळे कामानिमित्त येणाऱ्या नागरिकांना अडचण होत आहे. वाहन पार्किंगसाठी स्वतंत्र व्यवस्था करावी, अशी मागणी केली जात आहे.

-----------------------------------------

मालेगावी डासांचा उपद्रव

मालेगाव: शहरात डासांनी उच्छाद मांडला आहे. सायंकाळच्या सुमारास मोठ्या प्रमाणात डास आढळून येतात. यामुळे नागरिकांचे आरोग्य धोक्यात आले आहे. महापालिकेच्या आरोग्य विभागाकडून दैनंदिन फवारणी, प्रतिबंध औषधांची फवारणी केली जात नाही. वारंवार तक्रार करूनही दखल घेतली जात नाही. महापालिकेने शहरात तातडीने प्रतिबंधक औषधांची फवारणी करावी, अशी मागणी केली जात आहे.

---------------------------------------------

टेहरे चौफुली बनली मृत्यूचा सापळा

मालेगाव:- शहरालगतची टेहरे चौफुली मृत्यूचा सापळा बनली आहे. टेहरे रस्त्यावर मोठमोठे खड्डे पडले आहेत. खड्ड्यात रस्ते की रस्त्यात खड्डा अशी अवस्था झाली आहे. या रस्त्यावरून मोठ्या प्रमाणात अवजड वाहनांची वाहतूक होत असते तसेच ३० ते ४० खेड्यांचा संपर्क रस्ता म्हणून हा रस्ता ओळखला जातो. मात्र सार्वजनिक बांधकाम विभागाने रस्ता दुरुस्तीकडे साफ दुर्लक्ष केल्याने नागरिकांमध्ये संताप व्यक्त केला जात आहे.

--------------------------------------------------

स्टेट बँक चौकात वाहतूक कोंडी

मालेगाव: शहरातील स्टेट बँक चौक परिसरात वाहतूक कोंडीची समस्या निर्माण झाली आहे. याठिकाणी स्टेट बँक शाखेसह दोन हॉटेल असल्याने नेहमीच वर्दळ असते. मात्र वाहनधारक रस्त्यावरच वाहने उभी करत असल्यामुळे वाहनधारकांना कसरत करीत वाहने हाकावी लागत आहेत. याठिकाणी स्वतंत्र पार्किंगची व्यवस्था करावी अशी मागणी केली जात आहे.

------------------------------------------------------------

रस्त्यात खड्डे की खड्ड्यात रस्ता

मालेगाव:- सोयगाव ते सब स्टेशन दरम्यानचा रस्ता खड्ड्यात रस्ता की रस्त्यात खड्डा असा झाला आहे. या रस्त्यालगत मोठ्या प्रमाणात नागरी वसाहती आहेत. विद्यार्थी व ज्येष्ठ नागरिकांना या रस्त्यावरून चालता येत नाही. वाहनधारक कसरत करीत वाहने हाकत आहेत. या रस्त्यावर खड्ड्यांचे साम्राज्य पसरले आहे. महापालिकेने तातडीने हा रस्ता दुरुस्त करावा अशी मागणी केली जात आहे.