नाशिक : कोरोनाच्या पार्शभूमीवर शिवसेनेने शिवाजीपार्कवर केवळ शंभर लोकांच्या उपस्थितीत दसरा मेळावा साजरा करावा अन्यथा शिवसेनेला कारवाईला सामोरे जावे लागेल असा इशारा केंद्रीय सामाजिक व न्याय राज्यमंत्री रामदास आठवले यांनी नाशिकमध्ये रविवारी पत्रकार परिषदेत बोलताना दिला आहे.
राज्यातील कोरोनाचा स्थिती पाहता यापूर्वी छत्रपती शिवाजी महाराज जयंती, डॉ. बाबासाहेब आंबेडकर जयंती, बुद्धपौर्णिमा तथा गणेशोत्सव अतिशय साध्यापणाने साजरा करण्यात आला आहे. त्यानुसार शिवसेनेनेही शिवाजीपार्कवर झेंडे लावून शंभर लोकांच्या उपस्थितीत दसरा मेळावा साजरा करावा. अन्यथा काद्याचे उल्लंघन केल्याप्रकरणी मुख्यमंत्री उद्धव ठाकरे यांनाच शिवसेनेवर कारवाई करावी लागेल असा चिमटाही त्यांनी काढला. यावेळी राज्यातील महाआघाडी सरकारला टिकेचे लक्ष करीत महाराष्ट्र एक नंबरवर पोहोचला आहे. परंतु मुख्यमंत्र्यांमुळे नव्हे, तर कोरोनामुळे असा टोला लगावला. राज्यातील सरकार सध्या तीन चाकांवर चालले असून असे सरकार दिर्घ काळ चालणार नसल्याचे भाकितही त्यांनी यावेळी केले. त्याचप्रमाणे राज्यात परतीच्या पावसाने थैमान घातले असून उपमुख्यमंत्री अजित पवार यांनी शेतकऱ्यांना मदतीसाठी केंद्राकडे १० हजार कोटींची मागणी केली आहे. परंतु, तत्काळ एवढी मदत शक्य नाही.त्यामुळे राज्य सरकारने कर्ज काढून शेतकऱ्यांना मदत करावी असा सल्लाही त्यांनी दिला. दरम्यान, मराठा मराठा समाजाचा ओबीसीत समावेश न करता स्वतंत्र आरक्षण मिळायला हवे अशीच आमची भूमिका असल्याचे त्यांनी यावेळी स्पष्ट केले.
मुख्यमंत्र्यांवर काँग्रेस राष्ट्रवादीचा दबाव
केंद्रीय मंत्रीमंडळाने मंदीरे खुली करण्यासंदर्भात निर्णय घेतला असून भाविकांच्या मागणीनुसार राज्यातील मंदीरेही खुली करण्याची गरज आहे. फिजिकल डिस्टन्सचे पालन करून मंदिरे उघडणे शक्य आहे. परंतु, मात्र मुख्यमंत्री उद्धव ठाकरे यांच्यावर सत्तेत सहभागी असलेले काँग्रेस आणि राष्ट्रवादीचा दबाव असल्यानेच ते मंदीरे उघडण्याचा निर्णय घेत नसल्याचा आरोपही रामदास आठवले यांनी केला आहे.
ड्रग्स घेणाऱ्या अभिनेत्रींना टाळा
बॉलीवूडमधील चित्रपट निर्मात्यांनी ड्रग्स घेणाऱ्या अभिनेत्रींना काम देऊन नये, अन्यथा अशा निर्मात्यांचे चित्रपट प्रदर्शीत होऊ देणार नाही असा इशारा रामदास आठवले यांनी दिला आहे. त्याचप्रमाणे बॉलीवूड मुंबईतच राहणार असून ते इतरत्र हलविण्याचा कोणीही प्रयत्न करू नये असा इशाराही त्यांनी दिला आहे.