दुर्गा उद्यानाचे पदपथ गायब नाशिकरोड : नाशिकरोड येथील दुर्गा उद्यान तसेच जुन्या बिटको रुग्णालयाकडे जाणाऱ्या पदपथावर फळ तसेच भाजी विक्रेत्यांनी अतिक्रमण पदपथ गायब झाले आहेत. येथील पदपथावर फळ विक्रेत्यांनी दुकाने थाटून अतिक्रमण केले आहे. विक्रेत्यांना येथील भाजी बाजारात जागा असतानाही विक्रेत्यांनी रस्त्यावर दुकाने थाटली आहेत.
शंकरनगर येथील चौक धोकादायक द्वारका : शंकरनगर येथील तपोवन चौफुलीवर असलेला वाहतूक बेट धोकादायक ठरत आहे. द्वारका-टाकळी मार्गावरील शंकरनगर चौकात असलेले तात्पुरते वाहतूक बेट रस्त्याच्या मधोमध नसल्याने वाहनधारकांची गैरसोय होत आहे. तपोवनकडून येणाऱ्या वाहनांसाठी सरळ मार्ग झाला असून, ड्रीमसिटीकडून येणाऱ्या वाहनधारकांना चौकात वळण घ्यावे लागते.
उपनगर कॉलनीतील धोकादायक गतिरोधक
उपनगर : उपनगर काॅलनी रस्त्यावर टाकण्यात आलेले गतिरोधक उंच असल्यामुळे वाहनधारकांसाठी धोकादायक ठरत आहेत. या मार्गावर गतिरोधकाची आवश्यकता असली तरी नियमानुसार गतिरोधक तयार करण्यात आलेले नसल्याने सुरक्षिततेसाठी असलेले गतिरोधक धोकादायक ठरू पाहत आहे.
नवीन सीबीएस चौकात कोंडी
गंजमाळ : त्र्यंबकरोडवरील हाॅटेल राजदूतसमोरील नवीन सीबीएस चौकात उभ्या राहणाऱ्या चारचाकी वाहनांमुळे वाहतूक कोंडीची समस्या निर्माण होत आहे. अनधिकृत पार्किंगमुळे त्र्यंबकरोडने जाणाऱ्या वाहनांना अडथळा निर्माण होतो. त्यातून वाहतूक कोंडीची समस्या उद‌्भवत आहे.