नाशिक- स्वातंत्र्य दिनाच्या निमित्ताने भाजपाच्या वतीने नाशिक मध्ये आज तिरंगा बाईक रॅली आयोजित करण्यात आली होती या रॅलीमध्ये ग्राम विकास मंत्री गिरीश महाजन हे स्वतः मोटरसायकलसह सहभागी झाले होते.
नाशिक शहरातील गंगापूर रोडवरील शहीद सर्कल येथून या रॅलीचे आयोजन करण्यात आले होते. गिरीश महाजन यांच्या हस्ते या रॅलीला हिरवा झेंडा दाखवण्यात आला. यावेळी गिरीश महाजन हे देखील मोटर सायकलवर सहभागी झाले जेहान सर्कल, भोसला मिलिटरी स्कूल कॉलेज रोड मार्गे ही रॅली सिडकोतील त्रिमूर्ती चौकमार्गे पाथर्डी फाटा येथे पोहोचली आणि छत्रपती शिवाजी महाराज तसेच डॉ. बाबासाहेब आंबेडकर यांच्या पुतळ्याला अभिवादन करून रॅलीचा समारोप करण्यात आला. आमदार सीमा हिरे, भाजप जिल्हाध्यक्ष सुनील बच्छाव, शहराध्यक्ष प्रशांत जाधव यांच्यासह अन्य पदाधिकारी या रॅलीमध्ये सहभागी झाले होते.