चेहेडीजवळ शेतकऱ्यांवर हल्ला

दोघे जखमी : लुटीसाठी धारदार शस्त्राने वार

 नाशिकरोड : शिंदे व पळसे या गावांमधून नाशिकरोडकडे येणाऱ्या दोघा शेतकऱ्यांवर चेहेडी शिव येथे अज्ञात दुचाकीस्वारांनी अडवून धारदार शस्त्राने वार करत जखमी केले. एका शेतकऱ्याकडून सुमारे तीन हजार रुपयांची रोकड व मोबाइल घेऊन लुटारूंनी पोबारा केला.पोलीस सूत्रांनी दिलेली माहिती अशी की, पळसे येथून आज रविवारी (दि.७) पहाटे चार वाजेच्या सुमारास दुचाकीने शेतमाल घेऊन शेतकरी भाऊसाहेब बाबाजी सहाणे (५९) शहराकडे येत होते. या दरम्यान, चेहेडी शिव येथे एका दुचाकीवरून आलेल्या दोघांनी या शेतकऱ्याची दुचाकी अडविली आणि दमदाटी करत मारहाण करण्यास सुरुवात केली. सदर शेतकऱ्याने प्रतिकार करण्याचा प्रयत्न केला असता लुटारूंनी चाकूने वार करत शेतकऱ्याला गंभीर जखमी केले. सहाणे यांच्याजवळील तीन हजार रुपये व मोबाइल घेऊन चोरट्यांनी पळसेकडे दुचाकी दामटविली. तसेच दुसऱ्या घटनेत रस्त्यावरून पायी शेतमाल घेऊन जात असलेले वृद्ध शेतकरी कचरू नथू आमले (६७, रा. शिंदेगाव) यांनाही चोरट्यांनी अडविले आणि मारहाण करत झडती घेतली; मात्र त्यांच्याकडे काहीही मिळून आले नाही म्हणून चाकूने वार करत त्यांनाही जखमी केले. सहाणे यांना बिर्ला रुग्णालयात, तर आमले यांना बिटको रुग्णालयात उपचारार्थ दाखल करण्यात आले आहे. याप्रकरणी पोलिसांनी तपासचक्रे वेगाने फिरवून दहावा मैल येथील दोघा संशयितांना अटक केली आहे.